තමාට හෝ තම පියාට රුපියල් 26,82,246.57ක විදුලි බිලක් ලංකා විදුලි බල මණ්ඩලයෙන් ලැබී නොමැති බව පාර්ලිමේන්තු මන්ත්‍රී නාමල් රාජපක්ෂ මහතා පවසනවා.
මේ පිළිබඳව මන්ත්‍රීවරයා ප්‍රකාශ කර ඇත්තේ, මේ සම්බන්ධයෙන් පැහැදිලි කිරීමක් සිදු කරන ලෙසට ඉල්ලා විදුලි බල මණ්ඩලය වෙත ලිපියක් යොමු කර ඇති බවයි.
ජනතා විමුක්ති පෙරමුණේ හිටපු පළාත් සභා මන්ත්‍රී නලීන් හේවගේ මහතා විසින් තොරතුරු දැනගැනීමේ පනත යටතේ ඉල්ලා තිබූ විස්තරවලට ලංකා විදුලි බල මණ්ඩලය ප්‍රතිචාර දක්වා තිබුණා.
එහි දී එම මණ්ඩලය සඳහන් කර තිබුණේ, වීරකැටිය ප්‍රදේශයේ පිහිටි නිවසකට සැප්තැම්බර් මස 12 වනදා සිට 15 වනදා දක්වා තාවකාලික විදුලිය සැපයුමක් සිදු කළ බවයි.
එය හිටපු ජනාධිපති මහින්ද රාජපක්ෂ මහතාගේ ඉල්ලීමකට අනුව සිදු කළ බව ද එහි සඳහන්.
කෙසේ වෙතත් මේ පිලිබඳ අදහස් පළ කරමින්, නාමල් රාජපක්ෂ මන්ත්‍රීවරයා සියලු චෝදනා ප්‍රතික්ෂේප කර තිබෙනවා.
ඔව් මම බැලුවා. අපිට එහෙම බිලක් එවලා නැහැ CEB එකෙන්. මම මගේ ලේකම්වරයා හරහා විදුලිබල මණ්ඩලයට ලිඛිතව දැනුම් දීමක් කළා එහෙම බිලක් තියෙනවා ද ? කාගේ නමට ද තියන්නේ ? කවද්ද අපිට බිල එව්වේ කියලා කියන්න කියලා.
මටවත්, තාත්තී ගේ නමටවත් අද වෙනකම් එහෙම බිලක් ඇවිල්ලා නැහැ. මොකක්ද ඔය ට්‍රාන්ස්ෆෝමර් එකක් ගැන නේ කියන්නේ. එහෙම එකක් හයි කරලත් නැහැ. අපේ එඩ්ඩ්‍රස් එකට හයි කළා නම් බිලක් එවන්න එපැයි. CEB එකෙන් අපි යවන ලිපියට ප්‍රතිචාරයක් ලැබුනට පස්සේ ඉදිරි ක්‍රියාමාර්ග ගැන බලන්න පුළුවන්. RTI ලියුමේත් මගේ නමක් නැහැ නේ. අනිත් එක මගේ මගුල් ගෙදර කියලත් නැහැ. එහෙම නැතුව කට්ටියට චෝදනා කරන්න බැහැ. කියන්නා කෙසේ කීවත් අසන්නා සිහි බුද්ධියෙන් ඇසිය යුතුයි කියනවා නේ.