මන්නාරම ජපන් මිත්‍රත්ව පාලම අසල මුහුදු වෙරළේ තිබී නාදුනන මළ සිරුරක් ඊයේ පස්වරුවේ හමුවී තිබෙනවා.
එම පුද්ගලයා අවුරුදු 35 – 45 ත් අතර වයසක පසුවන, උස අඩි 05 යි අඟල් 10 ක් පමණ වන පුද්ගලයෙකු බවයි මන්නාරම පොලිසිය සඳහන් කළේ.
ඔහු මියයන විට, කළු පාට අත් දිග කමිසයක් සහ නිල් හා සුදු කොටු සරමක් හැඳ සිට තිබෙනවා.
හදිසි මරණ පරීක්ෂණය සිදුකර මෘත ශරීරය මේ වන විට මන්නාරම රෝහලේ මෘත ශරීරාගාරයේ තැන්පත් කර තිබෙන බවයි පොලිස් මාධ්‍ය කොට්ඨාසය සඳහන් කළේ.
මේ අතර, හබරණ සතිපොළ අසල නාඳුනන මළ සිරුරක් ඇති බවට ඊයේ හබරණ පොලිසියට ලද පණිවුඩයක් මත විමර්ශන ආරම්භ කර තිබෙනවා.
මෙලෙස මිය ගොස් ඇත්තේ අවුරුදු 40 – 45 ත් අතර වයසේ පසුවන, උස අඩි 05 යි අඟල් 02 ක් පමණ වන පුද්ගලයෙක්.
ඔහු මියයන විට නිල්පාට අත්දිග කමිසයක් සහ අලු සහ සුදු පැහැයෙන් යුතු සරමක් ඇඳ සිට තිබෙනවා.
ඔහුගේ මෘත ශරීරය මේ වනවිට පොලොන්නරුව රෝහලේ මෘත ශරීරාගාරයේ තැන්පත් කර ඇති අතර හබරණ පොලිසිය මගින් වැඩිදුර විමර්ශන ක්‍රියාත්මකයි.