මෙහෙකාර සේවයේ යෙදුණු නිවස තුළම තරුණියක් අභිරහස් ලෙස මියයයි

රුපියල් විසිපන්දහසක මාසික ගෙවීමකට නිවසක මෙහෙකාරකම් කළ වයස අවුරුදු 17 ක තරුණියකගේ මළ සිරුරක් එම නිවසින් හමු වීමේ සිද්ධියක් සම්බන්ධයෙන් යාපනය පොලීසිය 26 දා පරීක්ෂණ ආරම්භ කර තිබෙනවා.

මේ සිද්ධිය සම්බන්ධයෙන් වහාම පරීක්ෂණ පවත්වන ලෙසත් අපරාධකරුවන් වහාම අත්අඩංගුවට ගෙන නීතිය හමුවට ඉදිරිපත් කරන ලෙසත් උතුරු පළාත් ආණ්ඩුකාරිණී පී. එම්.එස්.චාර්ල්ස් යාපනයේ ජෙයෂ්ඨ පොලිස් නිලධාරීන්ට දැනුම් දී ඇති බවයි වාර්තා වන්නේ.

මෙසේ මියගොස් ඇත්තේ යාපනයේ වඩුක්කෝඩෙයි මුදලියාර් කෝවිල් අඩි ප්‍රදේශයේ පදිංචි 17 හැවිරිදි තරුණියක්.

අධ්‍යාපන කටයුතුවල නිරත වීමට ආර්ථික ශක්තියක් නොමැති නිසා මෙසේ ඇයගේ මව විසින් මෙම තරුණිය යාපනයේ නිවසක මෙහෙකාරකමට ලබා දී ඇති බවයි අප වාර්තාකරු සඳහන් කළේ.

මාසික කුළිය වශයෙන් රුපියල් 25000 ක මුදලක් ලබා දීමට පොරොන්දු වූවත් ඇයට මාසයකට රුපියල් 5000 ක මුදලක් පමණක් නිවසේ අයිතිකරු විසින් ලබා ඇති බවයි වාර්තා වන්නේ.

මවට දරුවා බැලීමට යාම තහනම් කළ හාම්පුතා දුරකතනය ඔස්සේ මසකට විනාඩි තුනක කාලයක් පමණක් කතා කිරීමට අවස්ථාව ලබා දී තිබෙනවා.

මාස හතරකට පමණ පසුව එසේ දුරකතනයෙන් කතා කිරීමට ද ඉඩක් ලබා දී නොමැති අතර අදාළ හාම්පුතා නියමිත පරිදි වැටුප් ද ගෙවා නොමැති බවයි මුලික පරීක්ෂණවලින් හෙළි වී ඇත්තේ.

අවසානයේදී ඇය මියගොස් ඇති බවට පමණක් පණිවුඩයක් දැරියගේ මවට ලැබීමෙන් පසුව මරණය පිළිබදව තමන්ට විශාල සැකයක් පවතින බව දැරියගේ මව යාපනය පොලිසියට පවසා තිබෙනවා.

මරණය සම්බන්ධයෙන් පශ්චාත් මරණ පරීක්ෂණය පැවැත් වූ යාපනය ශීක්ෂණ රෝහලේ අධිකරණ වෛද්‍ය නිලධාරී ප්‍රේමකුමාර් නාමසිවායම් එම මරණය සම්බන්ධයෙන් විවෘත තීන්දුවක් ලබා දී මියගිය අයගේ ශරීරයේ කොටස් වැඩිදුර පරීක්ෂණ සදහා රජයේ රස පරික්ක්ෂකවරයා වෙත යවා ඇති බවයි පොලිසිය පැවසුවේ.