අල්ලස් ලබා ගැනීමේ චෝදනාවක් සම්බන්ධයෙන් මරදාන පොලීසියේ පරිසර අංශයේ ස්ථානාධිපතිවරයා අත්අඩංගුවට ගෙන තිබෙනවා.
කුලියාපිටිය දිසා අධිකරණය අසල දී ඔහු මෙලෙස අත්අඩංගුවට ගත් බව අල්ලස් හෝ දූෂණ විමර්ශන කොමිෂන් සභාව සඳහන් කරනවා.
ඒ දඹදෙණිය ප්‍රදේශයේ පුද්ගලයෙකු විසින් සිදු කළ පැමිණිල්ලකට අදාළවයි. කුලියාපිටිය දිසා අධිකරණයේ ගොනු කර තිබූ රිය අනතුරක් සම්බන්ධයෙන් වන්දි ඉල්ලා පවරා ඇති නඩුවකට අදාළව පැමිණිලිකරුට වාසි සහගත වන ආකාරයට අධිකරණයේ දී සාක්ෂි ලබාදීමට මරදාන පොලිසියේ පරිසර අංශයේ ස්ථානාධිපතිවරයා විසින් රුපියල් 10,000ක මුදලක් අල්ලස් වශයෙන් ඉල්ලා ඇති බව සඳහන්.
එම මුදල ලබාගන්නා අවස්ථාවේ දී අල්ලස් කොමිසම විසින් එම ස්ථානාධිපතිවරයා අත්අඩංගුවට ගෙන තිබෙනවා.