කොළඹ ප්‍රදේශයේ පිහිටි ශිෂ්‍ය වීසා මත තරුණ තරුණියන් වැඩිදුර අධ්‍යාපනය සඳහා යුරෝපා රටවලට යැවීමේ ආයතනයක් පවත්වාගෙන ගිය කෝටිපති ව්‍යාපාරිකයෙක් තරුණියක් දූෂණය කිරීම සම්බන්ධයෙන් (17) අත්අඩංගුවට ගෙන තිබෙනවා.
මෙලෙස දූෂණයට ලක්ව ඇත්තේ එම ආයතනයේ සේවය කරන තරුණියක් වන අතර කොළඹ තරු පහේ හෝටලයක ආයතනය විසින් සංවිධානය කරන ලද විශේෂ සාකච්ඡාවක් පැවැත්වෙන බැවින්, එයට පැමිණෙන ලෙස සැකකාර කෝටිපති ව්‍යාපාරිකයා මෙම තරුණියට ද දැනුම්දී ඇති බවයි වාර්තා වෙන්නේ.
සැකකරු එම හෝටලයේ රැස්වීම් ශාලාවක් කල් තියා වෙන් කරගෙන තිබී ඇති අතර, තරුණ සේවිකාව එම ශාලාවට ගිය අවස්ථාවේ දොර වසා, ඇය දූෂණය කර තිබෙනවා.
තරුණිය මේ පිළිබඳව පොලිස් ළමා හා කාන්තා අපයෝජන වැළැක්වීමේ කොට්ඨාසයට පැමිණිලි කර ඇති අතර ඒ අනුව කෝටිපති ව්‍යාපාරිකයා සැකපිට අත්අඩංගුවට ගෙන ඇති බවයි වාර්තා වෙන්නේ.
මේ වන විට අතවරයට ලක්වූ තරුණිය වෛද්‍ය පරීක්ෂණයක් සඳහා රෝහල් ගත කර තිබෙනවා.
කෙසේ වෙතත් සැකකරු පොලීසිය හමුවේ ප්‍රකාශ කර ඇත්තේ තරුණිය කැමැත්තෙන් තමා සමග පැමිණි බවයි.