ශ්‍රී ලංකාව 2023 ආසියානු මලල ක්‍රීඩා ශූරතාවලියේ වැඩිම පදක්කම් සංඛ්‍යාවක් සමඟින් 4 වැනි ස්ථානයට පත්ව තිබෙනවා.
එය ආසියානු මලල ක්‍රීඩා ශූරතාවලියේ ශ්‍රී ලංකාව මෙතෙක් දක්වා ඇති හොඳම දක්ෂතාවය ලෙස ඉතිහාස ගත වනවා.
මීට පෙර 2007 වසරේ ශ්‍රී ලංකාව රන් 3 රිදී 2 සහ ලෝකඩ පදක්කම් 2ක් ලබා තිබෙනවා.
මේ අතර ආසියානු මළල ක්‍රීඩා උළලේ අද දිනයේ පැවති තරඟවලදී ශ්‍රී ලංකාවට රන් පදක්කම් 2ක් රිදී පදක්කමක් සහ ලෝකඩ පදක්කමක් හිමි වුණා.
මීටර් 800 කාන්තා ඉසව්වේ රන් පදක්කම නව ශ්‍රී ලංකා වාර්තාවක් පිහිටුවමින් දිනා ගැනීමට තරුෂි කරුණාරත්න සමත් වුණා.
එහි දක්ෂතාව විනාඩි 2 දශම 6යි 6ක්. එමෙන්ම මෙම දක්ෂතාවය ආසියානු මළල ක්‍රීඩා උළෙලක මෙම ඉසව්වේ හොදම දක්ෂතාව ලෙසද සටහන් වන්නේ වසර 25ක පැරණි වාර්තාවක් බිද හෙළමින්.
මෙම ඉසව්වේ ලෝකඩ පදක්කම ගයන්තිකා අබේරත්න දිනා ගත්තේ විනාඩි 2 දශම 2 යි 5ක දක්ෂතාවයක් සහිතවයි.
මේ අතර කාන්තා මීටර 400 ය 04 සහය දිවීමේ තරඟාවලියේදී රිදී පදක්කමද ශ්‍රී ලංකාවට හිමිවුණා. ඒ සඳහා වාර්තා කළ කාලය විනාඩි 03 යි තත්පර 33 යි දශම 2 යි 7 ක්.
නදීශා රාමනායක, සයුරි මෙන්ඩිස්, නිශේන්ද්‍රා ප්‍රනාන්දු සහ තරුෂි කරුණාරත්න එම ඉසව්ව නියෝජනය කරමින් මෙම රිදී පදක්කම ශ්‍රී ලංකාවට හිමිකර දුන්නා.
එමෙන්ම මීටර 400 ය 04 පිරිමි ඉසවිවේ රන් පදක්කම නව තරගාවලි වාර්තාවක් සහ ජාතික වාර්තාවක් සහිතව හිමිකර ගැනීමට ඔවුන් සමත් වුණා.
එහිදී ඔවුන්ගේ දක්ෂතාව විනාඩි 3 තත්පර 1යි දශම 56 ක්. අරුණ දර්ශන, රජිත රාජකරුණා, පබසර නිකූ සහ කාලිංග කුමාරගේ ශ්‍රී ලංකා කණ්ඩායම නියෝජනය කළා.
