දකුණු මුහුදු තිරයේ ධිවර කටයුතුවල නිරතව සිටි සචින්ත පුතා නැමති බහුදින ධිවර යාත්‍රාවේ සිටි ධිවර කාර්මිකයින් පිරිසකට ඉන්දුනිසියාවට අයත් බහුදින යාත්‍රාවකින් එල්ලකරනු ලැබු පෙට්‍රල් බෝම්බ ප්‍රහාරයක් නිසා පිළිස්සුම් තුවාල ලබා ධිවර කාර්මිකයකු නාවික හමුදාව විසින් ගොඩබිමට රැගෙනවිත් ඊයේ (11) රාත්‍රි ගාල්ල කරාපිටිය ශික්ෂණ රෝහලට ඇතුලත්කොට ඇත.
මෙම පෙට්‍රල් බෝම්බ ප්‍රහාරයෙන් ධිවර කාර්මිකයාගේ මුහුණ හා දෙපාවලට තුවාල සිදුවි ඇත. ඔහු ගාල්ල කරාපිටිය ශික්ෂණ රෝහලේ 58 වැනි වාට්ටුවේ ප්‍රතිකාර ලබන අතර පිළිස්සුම් තුවාල ලබා ඇත්තේ මුරුගයියා ශිවසාමින්දන් (33) නැමැති පාටලිපුරම්, මුතුර් ප්‍රදේශයේ පදිංචිකරුවෙකි.
සචින්ත පුතා නැමති මෙම බහුදින යාත්‍රාවෙන් ධිවර කාර්මිකයින් පස් දෙනෙකු ජුනි මස 22 වැනි දින මිගමුව ධිවර වරායෙන් මුහුදු ගොස් ඇත.
මොවුන් දකුණු මුහුදු තීරයේ ධිවර කටයුතුවල නිරතවෙමින් සිටියදි ඉකුත් 09 වැනිදි ඉන්දුනීසියාවට අයත් බහුදින ධීවර යාත්‍රාවකින් මෙරට ධීවර යාත්‍රාවට පෙට්‍රල් බෝම්බ ප්‍රහාරයක් එල්ලකර තිබේ.
මෙම බෝම්බ ප්‍රහාරයෙන් බරපතල පිළිස්සුම් තුවාල ලැබු ධිවර කාර්මිකයා මෙරට මුහුදු සිමාවෙන් ගමන්කරමින් තිබු නෞකාවක් වෙත ලබාදිමට ධිවර යාත්‍රාවේ සිටි අනිකුත් ධිවරයින් විසින් කටයුතු කර ඇත.
පසුව එම නෞකාව මගින් ධිවර කාර්මිකයා දක්ෂිණ නාවික කදවුරේ නාවික හමුදා නිලධාරින් වෙත භාරදි ඇත.
නාවික හමුදාව විසින් ධිවර කාර්මිකයා ගාල්ල වරායට රැගෙනවිත් ප්‍රථිකාර සඳහා ගාල්ල කරාපිටිය ශික්ෂණ රෝහලට ඇතුළත්කොට තිබේ.