ලේක් හවුසියට සහ සිළුමිණ ක්‍රීඩා මාධ්‍යවේදී ෆවුස් මොහොමඩ්ට එරෙහිව ශ්‍රී ලංකා ක්‍රිකට් වාරණයක් ගනී !

ශ්‍රී ලංකා ක්‍රිකට් ආයතනය සහ එහි නිලධාරීන් සම්බන්ධයෙන්වන කරුණු සහ ප්‍රකාශ ප්‍රචාරය කිරීම සහ ප්‍රසිද්ධියට පත් කිරීමෙන් සිළුමිණ පුවත්පත, www.silumina.lk වෙබ් අඩවිය සහ ඊට අදාළ සමාජ මාධ්‍ය ගිණුම් වළක්වමින් කොළඹ දිසාධිකරණය විසින් වාරණ නියෝග තුනක් නිකුත් කර තිබේ.

සිළුමිණ පුවත්පතේ මාධ්‍යවේදියෙක් වන ෆවුස් මොහොමඩ්ට සහ සීමාසහිත එක්සත් ප්‍රවෘත්ති පත්‍ර සමාගමට එරෙහිව ශ්‍රී ලංකා ක්‍රිකට් ආයතනයේ සභාපතිවරයා සහ උප සභාපතිවරයා විසින් ගොනු කර ඇති පැමිණිල්ලක් සලකා බැලීමෙන් අනතුරුව මෙම වාරණ නියෝග කොළඹ දිසා විනිසුරු සඳුන් විතාන විසින් මෙම වාරණ නියෝග නිකුත් කර තිබේ.

සිළුමිණ පුවත්පතේ සහ එම වෙබ් අඩවියේ පළවූ පුවතකට එරෙහිව ශ්‍රී ලංකා ක්‍රිකට් ආයතනයේ සභාපති සහ උප සභාපති විසින් රුපියල් බිලියනයක වන්දි මුදලක් ඉල්ලා මෙම නඩුව ගොනු කර තිබුණි.

එම පුවත්පතේ ජ්‍යෙෂ්ඨ මාධ්‍යවේදියෙක්වන ෆවුස් මොහොමඩ්ට සහ සීමාසහිත එක්සත් ප්‍රවෘත්ති පත්‍ර සමාගම මෙහි විත්තිකරුවන් ලෙස නම් කර සිටිති.

ඉකුත් ජූනි මස 26 වැනිදා එම නඩුව කැඳවූ අවස්ථාවේදී පැමිණිලිකාර පාර්ශ්වය ඉදිරිපත් කළ කරුණු සලකා බැලූ අධිකරණය ඔවුන් ඉල්ලා සිටි වාරණ නියෝග තුනක් නිකුත් කිරීමට තීරණය කර ඇත.

ඒ අනුව මෙම පැමිණිල්ල සම්බන්ධයෙන් වන නඩුව විභාග කර අවසන් වන තෙක් ශ්‍රී ලංකා ක්‍රිකට් ආයතනය සහ එහි නිලධාරීන් සම්බන්ධයෙන් වන කරුණු ප්‍රකාශ සහ ඔවුන්ට අපහාස වන ආකාරයේ ප්‍රකාශ පළ කිරීම වළක්වා තිබේ.

මෙම වාරණ නියෝග සිළුමිණ පුවත්පත, www.silumina.lk වෙබ් අඩවිය සහ මෙහි විත්තිකරුවන් විසින් පවත්වා ගෙන යන සියලුම සමාජ මාධ්‍ය ගිණුම්වලට අදාළ වේ.

මෙම නඩුවට අදාළ විරෝධතා සහ පිළිතුරු ජූලි මස 10 වැනිදා හෝ ඊට පෙර ගොනු කරන ලෙස නියම කර තිබේ. නීතිඥ සංජේ ෆොන්සේකාගේ උපදෙස් මත ජනාධිපති නීතීඥ කුවේරා ද සොයිසා සහ පසිඳු බණ්ඩාර පැමිණිල්ල වෙනුවෙන් පෙනී සිට ඇත.