පසුගිය 29 දා සවස 3ට පමණ තෙල්දෙණිය කෙන්ගල්ලේ පිහිටි අශාන් ට්‍රේඩර්ස් නැමැති වාහන අලෙවි ස්ථානයෙන් ඩිෆෙන්ඩර් රථ තුනක් සහ කේ.ඩී.එච් වර්ගයේ වෑන් රථයක් පැහැර ගැනීමේ සිද්ධිය සම්බන්ධයෙන් පොලීසිය විසින් සැකපිට අත්අඩංගුවට ගනු ලැබූ මධ්‍යම පළාත් සභාවේ හිටපු පොහොට්ටු මන්ත්‍රී කමල් අජිත් කුමාර බෙලිගොල්ලගේ ගේ පුතා ඇතුළු සිව් දෙනා තෙල්දෙණිය දිසා අධිකරණයට ඊයේ (01) ඉදිරිපත් කළේය.
අනතුරුව ඔවුහු මෙම මස 05 දින තෙක් රක්ෂිත බන්ධනාගාර ගත කරනු ලැබූහ.
පොලී මංගල උකස් ගත් රථ
සැකකරුවන් විසින් පැහැර ගෙන තිබුණේ මීට වසරකට පමණ පෙර සිය කාර්යාලය තුළ දී වෙඩි තබාගෙන සිය දිවි නසා ගත් පොලී මංගල නැමැති ව්‍යාපාරිකයාගේ රිය පොලෙහි තිබූ වාහන 04කි.
පොලී මංගල ජීවත්ව සිටි සමයේ දී වාහනත් උකස් ගත්තේය. පැහැර ගත් වාහනවලින් කේ.ඩී.එච්. වෑන් රථයත්, ඩිෆෙන්ඩර් දෙකකුත් ඔහු ජීවත්ව සිටි කාලයේ දි උකස් ගත් වාහනය. කේ.ඩී.එච් වර්ගයේ වෑන් රථය උකස් කර තිබුණේ හලාවත ප්‍රදේශයේ දේවාලයක කපුවෙකි.
ඩිෆෙන්ඩර් රථ දෙකක් මාවනැල්ල ප්‍රදේශයේ ව්‍යාපාරිකයෙකු විසින් ඔහුට උකස් කර තිබිණි.
එක් ඩිෆෙන්ඩර් රථයක් පොලී මංගල විසින් මිලදී ගෙන තිබුණු එකකි.
සැකකරුවන් අත්අඩංගුවට ගැනීමෙන් පසු පොලීසිය අධිකරණයට කරුණු වාර්තා කර පැය 24 ක රඳවා තබා ගැනීමේ නියෝගයක් ලබා ගත්තේය.
අනතුරුව ඔවුන් ගෙන් දීර්ඝ ලෙස ප්‍රශ්න කර සිද්ධියේ සුලමුල අනාවරණය කර ගැනීමට පොලිසියට හැකි විය.
අනතුරුව සැකකරුවන් ඊයේ (01) තෙල්දෙණිය දිසා අධිකරණයට ඉදිරිපත් කිරීමට පොලීසිය පියවර ගත්තේය.
ඩිෆෙන්ඩර් රථ
පොලිස් භාරයට ගත් ඩිෆෙන්ඩර් රථ තුනෙන් දෙකක් පොහොට්ටුවේ හිටපු පළාත් සභා මන්ත්‍රී කමල් අජිත් කුමාර බෙලිගොල්ලට අයත් වත්තේගම පොලිස් වසමේ පල්ලේගම දොරගමුව ප්‍රදේශයේ පිහිටි නිවස පිටුපස ගරාජයේ සඟවා තිබී සොයාගනු ලැබුවේය.
අනෙක් ඩිෆෙන්ඩර් රථය සොයා ගනු ලැබුවේ නිට්ටඹුව වතුපිටිවල ප්‍රදේශයේ නිවසක තිබියදී ය.
පැහැරගත් වාහන වල වටිනාකම රුපියල් ලක්ෂ 770 ක් බව අනාවරණය වී තිබේ.
කොල්ලය මෙහෙයවීම
කොල්ලය මෙහෙයවා ඇත්තේ වත්තේගම ප්‍රදේශයේ ගරාජ් හිමිකරුවෙකු විසිනි.
ඒ සඳහා ගරාජයේ සේවකයින් කිහිප දෙනෙකු සමඟ බාබර්වත්ත ප්‍රදේශයේ පුද්ගලයෙකු සම්බන්ධ වී ඇත.
සැකපිට අත්අඩංගුවට ගත් ගරාජ් හිමිකරු වාහන පැහැරගෙන ඒවා හි කොටස් වෙනත් වාහන වලට බද්ධ කර විකුණන අයෙකු බව පොලිස් පරීක්ෂණ මගින් හෙළිව තිබේ.
මෙම සිද්ධියට සම්බන්ධ තවත් තිදෙනෙකු අත්අඩංගුවට ගැනීම සඳහා පරීක්ෂණ පවත්වන බවත් ඒ අතර වාහන පැහැර ගැනීමේ සිද්ධීන් කිහිපයකට සම්බන්ධ පාතාල කල්ලි සාමාජිකයෙකු සිටින බවත් දැන ගන්නට ඇත.
වාහන කොල්ලය සිදුකළ අවස්ථාවේ සැකකරුවන් වාහන අළෙවි ස්ථානයේ තිබූ ජංගම දුරකතනයක් ද රැගෙන ගොස් තිබෙන අතර ඒ ඔස්සේ සිදුකළ පරීක්ෂණ මගින් සැකකරුවන් පිළිබඳ හෝඩුවාවක් සොයා ගැනීමට පොලීසියට හැකිව තිබේ.
පැය කීපයක් පරක්කු වුනා නම් හොයලා ඉවරයි
කොල්ලය සිදුවී පැය කිහිපයක් ඇතුළත සැකකරුවන් හඳුනාගෙන වාහන සොයා ගැනීමට හැකිවීම නිසා ඒවාහි කොටස් ගලවා මුහුණුවර වෙනස් කිරීමට ඔවුන්ට නොහැකි වී තිබේ. යම් හෙයකින් තවත් පැය කිහිපයක් ප්‍රමාද වූයේ නම් මෙම වාහන සොයා ගැනීම පවා දුෂ්කර වනු ඇති බවත් පොලීසිය පවසයි.
උපුටාගැනීම – ලංකාසර