රුපියල් මිලියන 30 කට අධික වටිනාකමින් යුත් කේරළ ගංජා කිලෝ 92 ගෑම් 250 ක් මන්නාරම ඉලුප්පකඩවායි කලපු ප්‍රදේශයේ සඟවා තිබියදී සොයාගත් බවට නාවික හමුදාව පවසයි.
උතුරුමැද නාවික විධානයේ නිලධාරීන් පිරිසක් විසින් මන්නාරම ඉලුප්පකඩවායි ප්‍රදේශයේ සෝදිසි මුර සංචාරයක නිරත වූ අවස්ථාවේදී කලපු ප්‍රදේශයේ ඉතා සූක්ෂමව සඟවා තිබූ ගෝනි 03 ක් දැක පරික්ෂා කිරීමේදී එහිතිබූ පාර්ස්ල් 42 ක මෙම කේරල ගංජා තොගය සොයාගනු ලැබීය.
සොයාගත් මෙම කේරලගංජා තොගය මුහුදු මාර්ගයෙන් ඉන්දියාවේ සිට මන්නාරමට රැගෙනවිත් පසුව වෙනත් ප්‍රදේශයකට ජවාරම් කරුවන් රැගෙන යාමේ අරමුණින් යුතුව කලපු ප්‍රදේශයේ සඟවා තබන්නට ඇතැයි නාවික හමුදාව සැක පල කර සිටියි.
අත්අඩංගුවට ගත් කේරල ගංජා තොගය වැඩිදුර පරික්ෂණ කටයුතු සඳහා ලබාදෙන තෙක් නාවික හමුදා භාරයේම තැබීමට පියවර ගෙන ඇත.