2023 ලෝක කුසලාන එක්දින ක්‍රිකට් තරගාවලියට සුදුසුකම් ලබා ගැනීමේ තරගාවලියේ සුපිරි හය වටයේ දෙවැනි තරගයෙන් නෙදර්ලන්තය පරදා ලකුණු 21ක තියුණු ජයක් වාර්තා කරමින් ප්‍රසාද ලකුණු සටහනේ යළි පෙරමුණ ගැනීමට ශ්‍රී ලංකා කණ්ඩායම අද (30) සමත් වුණා.
ඒ අනුව සුපිරි 6 වටයේ ප්‍රසාද ලකුණු සටහනට අනුව තරග 3කදී තරග 3ක් ජය ගෙන ඇති ශ්‍රී ලංකාව ප්‍රසාද ලකුණු 6ක් සමගින් පෙරමුණේ පසුවන අතර, ප්‍රසාද ලකුණු හයකටම හිමිකම් කියන සත්කාරක සිම්බාබ්වේ කණ්ඩායම ප්‍රසාද ලකුණු සටහනේ දෙවැනි ස්ථානයේ රැදී සිටිනවා.
බුලවායෝ හී දී පැවැති තරගයේ කාසිය වාසිය දිනා පළමුවෙන් පන්දුවට පහරදුන් ශ්‍රී ලංකා කණ්ඩායම පන්දුවාර 47.4 ක් අවසානයේ සියලු දෙනා දැවී ලකුණු 213 ක් ලබා ගත් අතර, පිළිතුරු ඉනිම ක්‍රීඩා කළ නෙදර්ලන්තයට පන්දුවාර 40 ක් අවසානයේ සියලු දෙනා දැවී ලබා ගත හැකි වූයේ ලකුණු 192 පමණයි.
නෙදර්ලන්ත ඉනිම ආරම්භ කළ වික්‍රම්ජිත් සිං හා මැක්ස් ඔ ඩොවුඩ් ලකුණු නොලබා සිටියදී දවා ගැනීමට පිළිවෙලින් ලහිරු කුමාර හා ඩිල්ෂාන් මදුෂංක සමත් වුණා. කෙසේ වෙතත්, ලහිරු කුමාර මෙම තරගයේ දී ආබාධයකට ලක් වීම හේතුවෙන් යොමු කරනු ලැබුවේ පන්දුවාර 2ක් පමණයි. පළමු කඩුලු දෙක දැවී යාමෙන් අනතුරුව තෙවැනි කඩුල්ල සදහා පන්දු 80 කින් ලකුණු 77ක සම්බන්ධතාවයක් ගොඩ නැගීමට වෙස්ලි බැරෙසි හා බාස් ඩේ ලීඩ් සමත් වුණා.
බැරෙසි ලකුණු 52 ක් ලබා සිටියදී දුවද්දී දැවී යාමත් සමග එම සම්බන්ධතාවය බිද වැටුණා. ටෙජා නිදාමනුරු ලකුණු නොලබා සිටියදී දැවී ගියේ වනිදු හසරංගගේ පන්දුවක් කෙළින්ම කඩුල්ලේ වැදීමෙන්. බාස් ඩේ ලීඩ් ලකුණු 41 කටත්, සකිබ් සුල්ෆිකර් ලකුණු දෙකකටත්, ලෝගන් වෑන් බීක් ලකුණු නොලබා සිටියදීත් දවා ගැනීමට මහීීෂ් තීක්ෂණ සමත් වුණේ තරගයේ පාලනය ශ්‍රී ලංකාවට නතු කර දෙමින්. එම කඩුලු 3 ලකුණු 6 ක් තුළ බිද වැටුණා. ශරිස් අහමඩ් ලකුණු දෙකකට දුවද්දී දැවී ගියේ කුසල් මෙන්ඩිස්ගේ විශිෂ්ඨ පන්දු රැකීමක් හමුවේයි.
අනතුරුව ස්කොට් එඩ්වර්ඩ්ස් සමග පිටියේ එක් වූ රයන් ක්ලෙයින් ශ්‍රී ලංකා පන්දු යවන්නන්ට හිසරදයක් වෙමින් 9 වැනි කඩුල්ල සදහා පන්දු 28කින් ලකුණු 25ක සම්බන්ධතාවයක් ගොඩ නැගූ නමුත්, වනිදුගේ පන්දුවක් හමුවේ ක්ලෙයින් ලකුණු 5කට දැවී යාමත් සමග යළි තරගයේ පාලනය ශ්‍රී ලංකාවට නතු වුණා. ස්කොට් එඩ්වර්ඩ්ස් හයේ පහර 2 ක් හා හතරේ පහර 4 ක් සමගින් පන්දු 68 කින් නොදැවී ලකුණු 67 ක් ලබා ගනිමින් සිය කණ්ඩායම ජයග්‍රහනය කරා රැගෙන යාමට දැඩි උත්සාහයක නිරත වූ නමුත්, එය සාර්ථක වූයේ නැහැ. ඒ, අවසන් කඩුල්ල ලෙස අර්යාන් දත් ලකුණු 7 කට දවා ගැනීමට දසුන් ශානක සමත් වීම හේතුවෙන්.
පන්දු යැවීමේ දී තීක්ෂණ ලකුණු 31 කට කඩුලු 3 ක් ද, වනිදු හසරංග ලකුණු 53 කට කඩුලු 2 ක් ද බිද හෙලුවා. තරගයේ පළමුව පන්දුවට පහරදුන් ශ්‍රී ලංකාව ලකුණු 213 ක් රැස් කළේ ඉනිමේ සිව්වැනි කඩුල්ල ලකුණු 34 දී ද, පස්වැනි කඩුල්ල ලකුණු 67 දී ද දැවී ගිය පසුබිමකයි.
තරඟයේ පළමු පන්දුවෙන්ම පැතුම් නිස්සංක දවා ගැනීමට ලෝගන් වෑන් බීක් සමත් වුණා. කුසල් මෙන්ඩිස් ලකුණු 10 කට දැවී ගිය අතර, සධීර සමරවික්‍රම රැස් කළේ එක් ලකුණක් පමණයි. චරිත් අසලංක ලකුණු දෙකකට දැවී ගියා. දිමුත් කරුණාරත්න ලකුණු 33 ක් ලබා ගනිමින් මුල් පෙළ වැඩිම ලකුණු ලාභියා බවට පත් වුණා.
යළිත් අසාර්ථක වූ නායක දසුන් ශානක ලකුණු 5 කට දැවී යන විට ශ්‍රී ලංකා ලකුණු පුවරුව සටහන්ව තිබුණේ කඩුලු 6කට ලකුණු 96 ක් ලෙසයි.
වනිදු හසරංග ලකුණු 20 ක් ලබා ගනිමින් පසුපෙලට යම් ශක්තියක් එක් කළා. ශ්‍රී ලංකා ඉනිමේ හොඳම සබඳතාවය ගොඩනැගුණේ ඔහුගේ දැවී යාමෙන් අනතුරුවයි. ධනංජය ද සිල්වා හා මහේෂ් තීක්ෂණ 8 වැනි කඩුල්ල සඳහා එලෙස ගොඩ නැගූ සම්බන්ධතාවය පන්දු 78කින් ලකුණු 77ක්. තීක්ෂණ පන්දු 47කින් ලකුණු 28කට දැවී යාමත් සමග එම සබදතාවය බිද වැටුණා. ධනංජය ද සිල්වා පන්දු 111 කින් සටන්කාමී ලකුණු 93 ක් රැස් කරමින් ශ්‍රී ලංකා ඉනිමේ ගැළවුම්කරු බවට පත් වුණා.
ඔහුගේ ඉනිමට හයේ පහර 2 ක් හා හතරේ පහර 8 ක් ඇතුළත්. පන්දු යැවීමේ දී ලෝගන් වෑන් බීක් හා බාස් ඩේ ලීඩ් කඩුලු 3 බැගින් බිද හෙලුවා.
තරඟයේ වීරයා බවට පත්වුයේ සිය හොඳම එක්දින ජාත්‍යන්තර ඉනිම ක්‍රීඩා කල ධනංජය සිල්වා