ගාල්ල කොළඹ ප්‍රධාන මාර්ගයේ අම්බලන්ගොඩ නගරාසන්නයේ පිහිටි ධර්මාශෝක විද්‍යාලය අසලදී පුද්ගලයකු වෙඩිතබා ඝාතනය කොට ඇත.
වෙඩි වැදීමෙන් මියගොස් ඇත්තේ අම්බලන්ගොඩ රන්දොඹේ ප්‍රදේශයේ පදිංචිව සිටි පෙරුමාදුර උජිත්ද සොයිසා නොහොත් චූටි මාමා නැමති පනස් තුන් හැවිරිදි පුද්ගලයෙකි.
ඔහු අම්බලන්ගොඩ බස්නැවතුම්පොල අසල ත්‍රීරෝද රථයක් කුලී කරනා අයෙකු බවත් රාත්‍රි දහයයි හතලිස් පහට පමණ ත්‍රීරෝද රථයෙන් නිවෙසට යමින් සිටියදී යතුරු පැදියකින් පැමිණි පුද්ගලයින් දෙදෙනෙකු මොහුට පිස්තෝල වර්ගයේ ගිනි අවියකින් වෙඩි තබා ඇති බවත් මූලික පොලිස් පරීක්ෂණවලින් හෙලිවී ඇත.
ඝාතනය සම්බන්ධයෙන් මහේස්ත්‍රාත් පරීක්ෂණ පවත්වා දේහය පශ්චාත් මරණ පරීක්ෂණ කටයුතු සදහා බලපිටිය මූලික රෝහලට රැගෙන ගොස් තිබිණි.
සැකකරුවන් සම්බන්ධයෙන් මෙතෙක් කිසිදු තොරතුරක් අනාවරණය වී නොමැත.
අම්බලන්ගොඩ පොලිසිය විසින් පරීක්ෂණ පවත්වයි.