ඇමතිකමෙන් ඉවත් වන බවට කෙහෙළිය රඹුක්වැල්ලගෙන් ප්‍රකාශයක් !

ඖෂධ මිලට ගැනීම සඳහා අවශ්‍ය වන මුදල් නොලැබුණහොත් තමන් සෞඛ්‍ය අමාත්‍ය ධුරයෙන් ඉවත් වන බව සෞඛ්‍ය ඇමැති කෙහෙළිය රඹුක්වැල්ල මහතා පැවසීය.

රෝහල් දෙකක නිර්වින්දන ඖෂධ පිළිබඳව ඇති වූ ගැටලු පිළිබඳ කරුණු පැහැදිලි කරමින් ඔහු පාර්ලිමේන්තුවේ දී මෙසේ සදහන් කලේය.

අධිකරණය ගන්නා ඇතැම් තීන්දුවලින් බලපෑමක් ඇතිවී තිබෙන බවත් මුදල් ප්‍රශ්නයද මතු වී තිබෙන බවත් පැවසු ඔහු ඒ පිළිබඳව කටයුතු කිරීමට හැකියාවක් නැති නම් ඒ ගැන පාර්ලිමේන්තුවට දන්වන බව ද ඔහු කියා සිටියේය.

මෙම අඩුපාඩු පිරිමසා ගැනීමට තවදුරටත් නොහැකි නම් අමාත්‍යවරයා ලෙස තමන් තනතුරු දැරීමට තවත් බලාපොරොත්තු නොවන බව තීරණය කර ඇති බවද හෙතෙම තවදුරටත් පාර්ලිමේන්තුවේදී කියා සිටියේය.

තවද, ගැටලුකාරි තත්ත්වයකට පත්ව ඇති නිර්වින්දන ඖෂධය කිසිදු අවස්ථාවක ළමයින් සදහා භාවිත නොකළ බව සෞඛ්‍ය අමාත්‍ය කෙහෙළිය රඹුක්වැල්ල පාර්ලිමේන්තුවේදී ප්‍රකාශ කළා.

එම ඖෂධය වැඩිහිටියන් සදහා පමණක් භාවිත කරන බවයි ඔහු කියා සිටියේ.

පේරාදෙණිය බණ්ඩාරනායක ශික්ෂණ ළමා රෝහලේ සහ පේරාදෙණිය ශික්ෂණ රෝහලේදී සිදුකළ ශල්‍යකර්ම අතරතුර නිර්වින්දනය කිරීම සදහා ලබාදුන් ඖෂධ හෝ එහි උපකරණවල පවතින ගැටලුකාරි තත්ත්වය හේතුවෙන් කුඩා දරුවන් දෙදෙනෙකු ඇතුළු 4 දෙනෙකු ජිවිතක්ෂයට පත්වූ බවට වාර්තා පළ වුණා.