ජාත්‍යන්තර පාසැල් පිළිබඳව කටයුතු කිරීමට සහ ඒවා පිළිබඳ අධීක්‍ෂණය සහ නියාමනය කිරීම පිණිස විශේෂ ඒකකයක් අධ්‍යාපන අමාත්‍යාංශය තුළ පිහිටුවීමට අධ්‍යාපන කටයුතු පිළිබඳ ආංශික අධීක්ෂණ කාරක සභාවේදී යෝජනා වී තිබෙනවා.
ඒ හා සබැඳිව දැනට පවතින නීති රාමුව කාලීන අවශ්‍යතාවයන් අනුව සංශෝධනය විය යුතු බවටද එහිදී අදහස් පළ වුණා.
අධ්‍යාපනය පිළිබඳ ආංශික අධීක්ෂණ කාරක සභාව පසුගිය 08 වැනිදා එහි සභාපති පාර්ලිමේන්තු මන්ත්‍රී වී.රාධක්‍රිෂ්ණන් මහතාගේ ප්‍රධානත්වයෙන් පාර්ලිමේන්තු සංකීර්ණයේදී රැස්වුණා.
එහිදී ශ්‍රී ලංකාව තුළ ක්‍රියාත්මක වන ජාත්‍යන්තර පාසැල් පිළිබඳවත්, එම පාසැල් පද්ධතිය මඟින් සිසු දරුවන්ට ලබා දෙන අධ්‍යාපනය හා එහි ගුණාත්මකභාවය ඉහළ නැංවීම පිළිබඳවත් සාකච්ඡා කෙරුණු බවයි පාර්ලිමේන්තුවේ සන්නිවේදන දෙපාර්තමේන්තුව නිවේදනය කළේ.
තවද, මෙම පාසැල් පද්ධතිය තුල අධ්‍යාපනය ලබන සිසු දරුවන්ගේ අයිතීන් පිළිබඳවද මෙහිදී දීර්ඝ වශයෙන් සාකච්ඡා කෙරුණා. ජාත්‍යන්තර පාසැල් සහ අධ්‍යාපන අමාත්‍යාංශය යටතේ නොපවතින අනෙකුත් පාසැල් නියාමනය කිරීම සඳහා අවශ්‍ය නිර්නායක ජාතික අධ්‍යාපන කොමිෂන් සභාව (National Education Commission) විසින් සකස් කරමින් පවතින බවද මෙහිදී අනාවරණ වුණා.
ගුරු මාරුවීම් මෙන්ම ගුරු උපදේශක සේවයේ (In service Advisors) පවතින ගැටළු පිළිබඳවද කාරක සභාවේ අවධානය යොමු වූ බව පාර්ලිමේන්තුවේ සන්නිවේදන දෙපාර්තමේන්තුව නිකුත් කළ නිවේදනයේ සඳහන්.
එම ගැටළු නිරාකරණය කිරීමට ගත යුතු පියවර කඩිනමින් ගන්නා ලෙස කාරක සභාවේ සභාපතිවරයා විසින් අධ්‍යාපන අමාත්‍යාංශයේ නිලධාරීන් වෙත මෙහිදී උපදෙස් ලබා දුන්නා.
තවද, රජයේ පාසැල්වල පවතින ගුරු හිඟය පිළිබඳවත් මෙහිදී කාරක සභාවේ අවධානයට යොමු වූ අතර, ඉංග්‍රීසි මාධ්‍ය හා උසස් පෙළ පංති සඳහා ගුරුවරුන්ගේ හිඟයක් පවතින බව එහිදී අනාවරණය වූ තවත් කරුණක්.
ඒ අනුව, සිසු දරුවන්ගේ අඛණ්ඩ අධ්‍යාපනයට බාධාවක්ව පවතින මෙම ගුරු හිඟය මඟ හරවා ගැනීම පිණිස අවශ්‍ය පියවර කඩිනමින් ගන්නා ලෙසද කාරක සභාවේ සභාපතිවරයා විසින් අධ්‍යාපන අමාත්‍යාංශයේ නිලධාරීන් වෙත අවශ්‍ය උපදෙස් ලබා දුන්නා.
කාරක සභාවේ අවධානය යොමු වූ තවත් කරුණක් වූයේ දිවයින පුරා පෞද්ගලික උපකාරක පංති පවත්වන ගුරුවරුන්ගේ ගුණාත්මකභාවය පිළිබඳවයි. එම ගුරුවරුන්ගේ සුදුසුකම් හා ගුණාත්මකභාවය පිළිබඳව සමාජය තුළ පවතින කතිකාවත පිළිබඳවද කාරක සභාවේ අවධානය යොමුවුණා.
ඒ අනුව, පෞද්ගලික ගුරුවරුන් නියාමනයකට යටත් කොට ඔවුන්ගේ වෘත්තිය සඳහා නිසි පිළිගැනීමක් ඇති කොට දීම වඩාත් සුදුසු බවයි කාරක සභාව විසින් අධ්‍යාපන අමාත්‍යාංශයේ නිලධාරීන් වෙත නිර්දේශ කරනු ලැබුවේ.
වෙනත් රටවල පෞද්ගලික ගුරුවන් සඳහා බලපත්‍රයක් (Teaching License) ලබා දී එම වෘත්තිය සඳහා වෘත්තීය පිළිගැනීමක් ලබා දී ඇති බව කරුණු අනාවරණය වී ඇති බැවින්, එවැනි ක්‍රමවේදයක් ශ්‍රී ලංකාව තුළද අනුගමනය කිරීම වඩාත් උචිත බවට කාරක සභාව විසින් වැඩිදුරටත් නිර්දේශ ඉදිරිපත් කළා.
එබැවින් එවැනි ක්‍රමවේදයක් සකස් කිරීම පිළිබඳව කඩිනමින් අවධානය යොමු කර පෞද්ගලික උපකාරක පන්ති ගුරුවරුන් නියාමනය කොට ඔවුන් සඳහා වෘත්තීමය පිළිගැනීමක් නීත්‍යානුකූලව ලබාදීම සඳහා ගත යුතු පියවර පිළිබඳ වාර්තාවක් කාරක සභාව වෙත ඉදිරිපත් කරන ලෙස කාරක සභාවේ සභාපතිවරයා විසින් අධ්‍යාපන අමාත්‍යාංශයේ නිලධාරීන් වෙත දැනුම් දුන්නා.