කුරුණෑගල ගෝනගම ගොඩනැගිල්ලකට විදුලි ලබා ගැනීමට සවිකරන තිබූ යකඩයක් බඩු පැටවූ ලොරියක පැටලී ගැලවී පාරේ ගමන් කරමින් සිටි 13 හැවිරිදි දැරියකගේ හිසේ වැදීමෙන් දැරිය බරපතළ තුවාල ලබා ඇතැයි වාරියපොල දිසා රෝහල් ආරංචි මාර්ග කියයි.
නියමිත උසට වඩා භාණ්ඩ පැටවූ ලොරියක් විදුලි සැපයුම් රැහැනේ ගැටීම හේතුවෙන් එම ගොඩනැගිල්ලේ සවිකර තිබූ යකඩය ගැලවී ඇති බව ප්‍රදේශවාසීහු කියති.
තුවාල ලද දැරිය උපකාරක පංතියකට සහභාගීවීම පිණිස යමින් සිටියදී සිද්ධියට මුහුණ දී ඇත. අදාළ ලොරි රථය ගෝනගම නගරය ආසන්නයේදී ප්‍රදේශවාසීන් විසින් නවත්වාගෙන ඇත.
බරපතළ තුවාල ලද දැරිය වාරියපොල දිසා රෝහලට ඇතුළත් කළ අතර එහිදී මූලික ප්‍රථිකාර ලබාදිමෙන් අනතුරුව වැඩිදුර ප්‍රථිකාර සදහා දැරිය කුරුණෑගල ශික්ෂණ රෝහල වෙත මාරුකර යැවිණ.
සිද්ධියෙන් තුවාල ලැබූයේ ගෝනගම අළුපොතගම ප්‍රදේශයේ පදිංචි දැරියකි. කුරුණෑගල පොලිසිය සිද්ධිය සම්බන්ධ වැඩිදුර පරීක්ෂණ පවත්වයි.