ශ්‍රී ලංකා පොදුජන පෙරමුණ (SLPP) ආණ්ඩුවේ කොටසක් ලෙස රැඳී සිටින්නේ තම පක්ෂ නායකයන්ට ලබා දෙන වැදගත්කම මත පමණක් බව රාජ්‍ය අමාත්‍ය සනත් නිශාන්ත මහතා පවසනවා.
මාධ්‍ය වෙත අදහස් දක්වමින් රාජ්‍ය අමාත්‍යවරයා කියා සිටින්නේ ආණ්ඩුව පත්කර ගැනීම සඳහා වෙහෙස මහන්සී වී වැඩ කළ තම මන්ත්‍රීවරුන්ට අවශ්‍ය පිළිගැනීම ලබා නොදෙන්නේ නම් ශ්‍රී ලංකා පොදුජන පෙරමුණට තවදුරටත් ආණ්ඩුවේ රැඳී සිටීමේ අවශ්‍යතාවක් නොමැති බවයි.
එක්සත් ජාතික පක්ෂ හිටපු පාර්ලිමේන්තු මන්ත්‍රී පාලිත රංගේ බණ්ඩාර මහතාගේ හැසිරීම දැඩි ලෙස විවේචනය රාජ්‍ය අමාත්‍යවරයා පවසන්නේ තම පක්ෂ නායකයා රාජ්‍ය නායකයා වීම හේතුවෙන් ඔහුගේ ක්‍රියා කලාපය එසේ සිදුවන බවයි.
ශ්‍රී ලංකා පොදුජන පෙරමුණ අත්හැර දැමීමට උත්සාහ කළහොත් ජනාධිපති රනිල් වික්‍රමසිංහට තම සහයෝගය ලබා නොදෙන බවයි ඔහු වැඩිදුරටත් සඳහන් කළේ.
මේ අතර ආණ්ඩුව නියෝජනය කරන සියළුම පක්ෂ සඳහා අද (14) සවස 5ට ජනාධිපති ලේකම් කාර්යාලයේ විශේෂ රැස්වීමක් කැඳවීමට පියවර ගෙන තිබෙනවා.
පසුගිය 12 වනදා ජනාධිපති ලේකම් කාර්යාලයෙන් ආණ්ඩුව පාර්ශවයට මෙවැනිම රැස්වීමක් කැඳවීමට පියවර ගෙන තිබුණ ද පොහොට්ටුවේ දිස්ත්‍රික් නායකයින් බහුතරයක් එම රැස්වීම වර්ජනය කර ඇති පසුබිමකයි ජනාධිපති ලේකම් කාර්යාලය මෙම රැස්වීම කැඳවා ඇත්තේ.