ප්‍රවීණ ගායන ශිල්පී ක්‍රිස්ටෝපර් පෝල් මහතා අද (18) උදෑසන අභාවප්‍රාප්ත වී තිබේ.
රිස්ටෝපර් පෝල් කලා ශිල්පියා මතකයේ රැඳෙන ගීත සංගීත ලොවට තිලිණ කළ ගායකයන් අතර ප්‍රමුක තැනක් ගන්නා ගායකයෙකි. මොරටු පුත්‍රයෙකු වූ ඔහු අධ්‍යාපනය ලැබුවේ ශා :සෙබස්තියන් විදුහලෙන් අධ්‍යාපනය හැදෑරු ඔහු 1955 යුගයේ ඔහුගේ පාසැලේ සංගීත ගුරුතුමා වන ප්‍රැන්සිස් පෙරේරා මහතා ඔහුගේ ගායනා හැකියාව හඳුනා ගන්නා ලදී. හෙතෙම ක්‍රිස්ටෝපර් පෝල් තරුණ සිසුවා එවකට සංගීත ලොවේ ප්‍රවීනයෙකු වූ සුනිල් ශාන්තයන් වෙතට යොමු කරන ලදී. ඔහු යටතේ සංගීතය හැදෑරු ක්‍රිස්ටෝපර් පෝල් 1958 ගුවන්විදුලි සරල ගී පරීක්ෂණයෙන් A ශ්‍රේණියේ ගායකයෙකු ලෙස සමත් විය. “පේනා විලේ මැද ඕලු මලේ” යන සරල ගීය තම සොයුරිය වූ බර්නඩේත් පෝල් සමඟ ඔහු ගායනා කළේය.එය ඔහුගේ කුළුදුල් ගීතය විය. එකළ මොරිස් දහනායක, ටියුඩර්කඳනාරච්චි, රෝහිණි සුභ සිංහ ,රසිනා හකිම් ඔහුගේ සමකාලින කලා ශිල්පින් විය. ඔහු සැම මාසයකම ගුවන්විදුලියේ සරල ගී ගායනා කළේය. මොරටුවේ බැසිල් එම් සිල්වා සහ වර්ණන් පෙරේරා ඔහු හට ගී පද සහ තනු නිර්මාණයෙන් නිතරම සහය ගෙන දෙන ලදී.
1957 ඔහුට නව අදහසක් පහළ විය. එකළ මඩකලපුවේ මුහුදු වෙරළට මුතු බෙල්ලන් ගොඩගසා තිබී ඒවා කොළඹටම ගෙනැවිත් අලෙවි කරන ලදී. මෙම අදහස ඇතුළත් කොට බැසිල් එම් සිල්වා “බෙල්ලෝ මුතු බෙල්ලෝ ‘ ගීතය ප්‍රබන්ධය කළේය. වර්ණන් පෙරේරා තනුවක් යෙදුවේය.නව ගීතයක් නිර්මාණය විය. 1957 වසරේ මෙම ගීතය ඔහුගේ නම රසිකයන් අතරට ගෙන යෑමට සමත් විය. 1957 වසරේදීම ඔහු නව අත් හදා බැලීමක් ලෙස එවකට ජනප්‍රිය ගීතයක් වූ එල්විස් ප්‍රෙස්ලි ගේ “wooden heart” ගීතය තනුව අනුව “පෙම් ලෝකේ පුරා “යන ගීතය නිර්මාණය කරමින් ගායනා කරන ලදී. එවකට බොහෝ බටහිර ගී තනු වල කොටස් උකහා ගෙන සිංහල ගීත නිර්මාණය වුවද සම්පුර්ණයෙන්ම බටහිර තනුවක් අනුව මෙම ගීතය නිර්මාණය වී තිබුණි. එම හේතුවෙන් මෙම ගීතය සිංහල සහ බටහිර ගී අසන රසිකයන්ට දෙකොටස අතරම ජනප්‍රිය විය. ඉන් නොනැවතුණ ඔවුන් “Roses Remind me of rio”යන තනුව අනුව “රෝස මලක් දුටුවාම “marina marina යන ගීතයේ තනුව අනුව “මැණිකා මැණිකා “යන ගීතය ඇතුළු බටහිර තනු උපයෝගී කරගෙන ගීත ගණනාවක් ගායනා කළ අතර ඒ හැම ගීතයක්ම ජනප්‍රිය විය. මේ සැම ගීතයක්ම බැසිල් එම් සිල්වාගේ පද රචනාවන් විය. බටහිර තනු අනුව ලියවුණු මුත් ඔහුගේ ගායනා විලාසය එම ගීත අපේ ගීත අනන්‍යතාවය රැඳෙන ලෙස හඬ හසුරුවා ගැනීම ප්‍රසංසනිය වේ.
1958 නැවතත් ඔහු ගුණරත්න අබේසේකර පද රචනා කළ “හා මල් පිපෙන්නේ” ගීතය ගායනා කරන ලදී. ස්පාඤ්ඤ ගීතයක් වූ lazy mary යන ගීතයේ තනුව අනුව මෙම ගීතය නිර්මාණය වූ අතර බෙන්ගාලි ගීතයක් වූ කස කස බොලේ තනුව අනුව “වතුර නාලා තෙත කොන්ඩේ කඩා “යන ගීතය සරල ගීත වැඩසටහනට ගායනා කරන ලදී. එම ගීතය පී.එල්.ඒ සෝමපාල සංගීත සංයෝජනය කළ අතර ගී පද බණ්ඩාර කේ විජේතුංග ගෙනි. දක්ෂ පදරචකයෙකු වූ බණ්ඩාර කේ විජේතුංග මෙම ගීතය ඔහු සහ ක්‍රිස්ටෝපර් පෝල් ශිල්පියා කතා කරමින් සිටින විට ඒ අසලින් වතුර නාගෙන යන ලඳක් දැක එම දර්ශනය ගීතයට යොමු කර ගැනීමට හැකිවීම ඔහුගේ දක්ෂතාවයක් විය. මේ සැම ගීතයක්ම රසිකයන් අතර නිතර මුමුණන ගීත අතරට එකතු විය.
1968 වසරේ ඔහු ලිලානි ගුණසේකර මෙනවිය සමඟ විවාහ විය.”රුවන් තොරන් තනා” යන ස්ව නිර්මාණය බිහි වුණේ ඉන් පසුවය. බණ්ඩාර කේ විජේතුංග පදරචනා කළ මෙහි තනු ෂෙල්ටන් පෙරේරා ගෙනි.1970 “oh Mama Mama Iam very happy” යන බටහිර ගීතය අනුව “ඇලදොළ ගංගා” ගීතයත් මේ කටුරොද ගම්මානේ හිනැහෙන්න හැමදාම, මුස්තාෆා යන ගීත එළි දක්වන ලදී.
1980 යුගය වන විට “සැමදාම මේ වෙලාවේ “යන ගීතයද බටහිර තනුවක් අනුව නිර්මාණය විය.1980 වසරේ ඔහු මේ ගීතවලට අමතරව වික්ටර් රත්නායක තනු නිර්මාණය කළ “සුවිසල් මැඳුරක” “විශ්වාසය නිදන් කෙරු සිතක් බිඳුණු පසු ” “රාමා සීතා “යන ගීත සරල ගී සඳහා ගායනා කරන ලදී .”රන් කිරුළේ” ගීතය ගුණදාස කපුගේ ඔහු වෙනුවෙන් නිර්මාණය කරන ලදී. විවිධ වූ ශෛලීන්ට ගීත ගායනා කළ ද ඔහුගේ හඬ එක ලෙස පවත්වාගෙන යමින් අමරණිය ගීත සංගීත ලොවට තිලිණ කරමින් සංගීත ලොවට කළ සේවය වෙනුවෙන් 2013 වසරේ කලා භූෂණ සම්මානයෙන්ද ඔහු පිදුම් ලැබිය. මොරටුව කලා එකමුතුවේ ප්‍රබල සාමාජිකයෙකු වන ක්‍රිස්ටෝපර් පෝල් නිතරම නව නිර්මාණ කරමින් සිටින ගායකයෙකි. අපේ ගෙදර පුංචි යුද්ධයක්, ඇලදොළ ගංගා ,රෝස මලක් වැනි ජනප්‍රිය ගීත රැසක් ගායනා කළ ක්‍රිස්ටෝපර් පෝල් ඔහුගේ ජනප්‍රිය ගීත සහ නව ගී එකතුවක් රංජිත් ඩයස් සංගීත ශිල්පියාගේ නව සංගීත සංයෝජනයෙන් එළි දක්වන්නට කටයුතු සලසා ගෙන යන අතර 1950 යුගයේ සිට 2014 දක්වාම දෙස් විදෙස් රසිකයන්ට ගීත රසය බෙදා දෙන හදවතින් ගතින් තරුණය සමඟ පියා මනින ගායකයෙකි.