මහනුවර, බූවැලිකඩ ප්‍රදේශයේ සිදුවූ අනතුරකින් පියෙකු සහ පුතෙකු ජීවිතක්ෂයට පත්ව තිබේ.
එම පියා තම පුතා සමග මාර්ගය හරහා ගමන් කරමින් සිටියදී ජීප් රථයක ගැටී ඊයේ (16) රාත්‍රී 8.00 පමණ එම අනතුර සිදුව ඇති බව වාර්තා වේ.
අනතුර සිදුවූ අවස්ථාවේදී අදාළ ජීප් රථය පදවා ඇත්තේ, මධ්‍යම පළාත් සභාවේ හිටපු මන්ත්‍රීවරයෙකු බව වාර්තා වෙයි.
බූවැලිකඩ සංඝමිත්තා මාවතේ පදිංචිව සිටි 41ක් හැවිරිදි පුද්ගලයෙකු සහ ඔහුගේ 11 හැවිරිදි පුතා මෙලෙස අනතුරින් මියගොස් ඇත.
අනතුර සම්බන්ධයෙන් හිටපු පළාත් සභා මන්ත්‍රීවරයා අත්අඩංගුවට ගෙන ඇති අතර සිද්ධිය සම්බන්ධයෙන් මහනුවර පොලීසිය වැඩිදුර විමර්ශන සිදුකරයි.