ආන්දෝලනයට ලක් වූ කළුතර බාලිකා විද්‍යාලයේ දැරියගේ මරණයත් සමග චෝදනාවට ලක්වූ කළුතර බාලිකා විද්‍යාලයේ විදුහල්පතිනිය වූ තුශිනි වීරකෝන් ඇයට එල්ල වූ චෝදනාවට පසුබිම් වූ කරුණු සම්බන්ධව දීර්ඝ පැහැදිලිකිරීමක් යොමු කර තිබේ.
ඇය පැහැදිලිවම දන්වා සිටින්නේ රටේම අවධානයට ලක් වෙමින් අවාසනාවන්ත මිය ගිය සිය පාසලේ සිසු දැරියගේ මරණයෙන් අනතුරුව ඇයට එල්ල වූ අසත්‍ය සහ අසභ්‍ය චෝදනා සංසරණය කරනු ලැබුවේ කළුතර බාලිකා විද්‍යාලයිය ආදි ශිෂ්‍යා සංගමයේ දූෂිත නිලධාරිනියන් කිහිප දෙනෙක් බවය.
ඇය කළ සම්පූර්ණ පැහැදිලි කිරීම මෙසේය.
පසුගිය 6 වන දින අප කලුතර බාලිකා පාසලේ සිසුවියක් අභිරහස් ලෙස මහල් ගොඩනැගිල්ලකින් ඇද වැටී මිය යාම සම්බන්ධව ආන්දෝලාත්මක ප්‍රවෘත්ති රැසක් කතා බහට ලක් විය. අදාල සිසුවිය අප පාසලේ ශිෂ්‍යාවක් බැවින් පාසල මට්ටමින් ඔබ සියලු දෙනා දැනුවත් කිරීම සිදු කළ යුතුය.
මන්ද යත් මේ අවාසනාවන්ත මරණය අමානුශික ආකාරයෙන් උපයෝගී කර ගනිමින් විදුහල්පතිනිය ලෙස මා ඇතුළු ගුරුමණ්ඩලය හා පාසලේ ආදරණීය සිසු දියණියන් හා පාසල් ප්‍රජාවම අපහසුතාවයට පත් කරමින් ව්‍යාජ පුවත් සංසරණය වීමට පටන් ගෙන ඇති නිසාය.
මිය ගිය සිසුවියගේ ක්‍රියාවන් හෝ ඇයට සහය දුන් සිසුවියගේ ක්‍රියාකලපයන් පාසලක් ලෙස අපි කිසි දිනෙ සාධාරණීකරණය නොකරමු. පාසල තුළදී ඔවුන් පිළිබඳ කිසිදු පැමිණිල්ලක් පාසල තුළින් හෝ බාහිරින් අප වෙත වාර්තා වී නොමැති බව ද දැන්විය යුතුය.
එම අවාසනාවන්ත සිද්ධිය වූ පසු ගිය 6 වන දින රජයේ නිවාඩු දිනයක් වූ බැවින් හා එදින පාසල් නොපැවැත් වූ දිනයක් බැවින් එම මිය ගිය සිසුවිය හා ඇය එම ස්ථානයට රැගෙන ගිය සිසුවිය පිළිබඳ ව වගකීමක් පාසලක් ලෙස එදින තුළ අපට දැරිය නොහැකි බව වටහා ගැනීමට ඔබ සියළු දෙනා බුද්ධිමත් පාඨක පිරිසක් වන බව අප දනිමු.
එම මිය ගිය සිසුවිය මවගේ අනුදැනුම මත එදින නිවසින් පිටව ගොස් ඇති අතර පාසල් දිනයක් නොවන දිනයක දී හා වේලාවකදී ඇයගේ පෞද්ගලික ගමන් බිමන් ආවරණය කිරීම අප හට සිදු කළ හැකි කාරණාවක් නොවන බව ද පැවසිය යුතුය.
එහෙත් එකී අවාසනාවන්ත මරණය හා එම සිද්ධියට මුහුණ දුන් සිසුවිය පිළිකුල් සහගත ලෙස භාවිතා කරමින් මේ වන විට සමාජය පුරා පාසලේ ආදි ශිෂ්‍යා සංගමයේ එක්තරා නිළධාරින් පිරිසක් ව්‍යාජ තොරතුරු සිය පෞද්ගලික පළිගැනීම් වෙනුවෙන් භාවිතා කරමින් සිටී.
කලුතර බාලිකා පාසල කීර්තිමත් ඉතිහාසයක් හිමි පාසලකි. මේ වන විට පාසලේ විදුහල්පතිනිය ලෙස කටයුතු කරමින් සිටින්නේද පරිපාලන සේවයේ 1 තනතුර දරණ පාසලේ කීර්තිමත් ආදි ශිෂ්‍යාවකි.
ඇය මෙම පාසලට 2021 වසරේ පත් කර ඇති බව සැලවීමත් සමග ව්‍යාජ ව්‍යවස්ථාවක් යොදා ගනිමින් වසර දහයකට අධික කාලයක් මහා සභා රැස්වීම් පවා නොපවත්වා ආදිශිෂ්‍යා සංගමයේ විධායක තනතුරු දරණ ඉතාමත් සුළු පිරිසක් විදුහල්පතිනිය පත් වීම වැලැක්වීමට විවිධ ප්‍රයත්න දැරුව ද ඒ සියල්ල අසාර්ථක විය.
එමෙන්ම විදුහල මගින් පාලනය විය යුතු පාසල් බටහිර තූර්‍ය වාදක කණ්ඩායම් ඒ වන විට මෙම ආදි ශිෂ්‍යා සංගමයේ ඉහළ තනතුරු කූඨ ලෙස දරමින් සිටින කිහිප දෙනෙක් සිය පෞද්ගලික බූදලයක් ලෙස හසුරුවමින් විශාල දූෂණ වංචා රැසක් සිදු කර තිබුණි.
එවන් පසුබිමක ආදි ශිෂ්‍යා සංගමය තුළ හා තූර්‍ය වාදක කණ්ඩායම් තුළ ආදි ශිෂ්‍යා සංගමයේ ඉහල නිළතල දරණ කිහිප දෙනෙක් කළ මෙම කූඨ අසාධාරණ ක්‍රියා වලට එරෙහිව වත්මන් විදුහප්පතිනිය නීත්‍යානුකූලව මේ වන විට කටයුතු කරමින් සිටින නිසා එම සිද්ධීන්වලට අදාල ආදි ශිෂ්‍යා සංගමයේ නිළධාරිනියන් කිහිප දෙනා පාසලේ විදුහල්පතිනියට මිය ගිය සිසුවියගේ සිද්ධිය අමානුෂික ලෙස යොදා ගනිමින් අසත්‍ය හා අසභ්‍ය චෝදනා එල්ල කරමින් සිටින අතර ඔබ වෙබ් අඩවි මගින් ද එම ව්‍යාජ පුවත් සංසරණය විය.
මෙම ලිපිය ඔබ වෙත යොමු කරන ලද්දේ එම ව්‍යාජ පුවත් නිර්මාණය වීමේ හේතුව සහ එහි පිටුපස සිටින පැහැදිලි දූෂිත හස්තයන් පිලිබඳව හා ඔවුන්ගේ අරමුණ වන විදුහල්පතිනිය පාසලෙන් ඉවත් කර ඔවුන්ගේ වංචා දූෂණ හා විනය විරෝධී ක්‍රියාවන් තව දුරටත් සිදු කර ගෙන යාම බව මේ වන විට සාක්ෂි සහිතව ඔප්පු වී ඇති බවත් ඔබ වෙත දන්වා සිටීමය.
ස්තූතියි.