මන්නාරම දරුවන් පැහැර ගැනීමේ උත්සාහය ගැන පොලිස් මාධ්‍ය ප්‍රකාශකගෙන් නිවේදනයක් !

මන්නාරම ප්‍රදේශයේ පාසල් ළමයින් තිදෙනෙකු චොක්ලට් ලබා දී පැහැර ගැනීමට උත්සාහ කළ බවට ලැබුණු පැමිණිලිවල කිසිදු සත්‍යතාවක් නැතැයි පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නිහාල් තල්දූව මහතා සඳහන් කළා.

ඒ, එම පැමිණිලි තුන සම්බන්ධයෙන් කරන ලද විමර්ශනවලින් අනතුරුවයි.

මෙම සිද්ධීන් නිසා ආරක්ෂක අංශවලට මන්නාරමේ පාසල් ආසන්නයේ පිහිටි මාර්ගවලට විශේෂ ආරක්ෂාවක් ලබා දීමට බලධාරීන්ට සිදු වුණා.

ඉකුත් 6 වන දා සහ 8 වන දා මන්නාරම මූලස්ථාන පොලිසියට පාසල් සිසුවෙකු සහ සිසුවියක විසින් ඔවුන් පැහැර ගැනීමට උත්සහ කළ බව කියමින් පැමිණිලි තුනක් යොමු කර තිබෙනවා.

6 වන දා උදේ 6.30ට පමණ නිවසේ සිට ඒ අසල පිහිටි ක්‍රිස්තියානි දේවස්ථානයට ගිය සිසුවෙකුට සුදු පාට වෑන් රියකින් පැමිණි පිරිසක් එම සිසුවාට චොක්ලට් එකක් ලබාදීමට උත්සහ කර තිබුණා.

පසුව එම සිසුවා චොක්ලට් එක ගැනීම ප්‍රතික්ෂේප කිරීමෙන් පසු ඔහු පැහැර ගැනීමට උත්සහ කළ ද සිසුවා ඔවුන්ගෙන් බේරී පළා ගොස් තිබෙනවා.

ඉකුත් 8 වන දා ද උදෑසන 7.30ට පමණ එකොළොස් හැවිරිදි පාසල් සිසුවෙකුට ද සුදු පාට වෑන් රියකින් පැමිණි පිරිසක් චොක්ලට් එකක් ලබා දීමට උත්සහ කළ ද එය ප්‍රතික්ෂේප කළ විටදී ඔහු පැහැරගෙන යාමට උත්සාහ කළ ද ඔහු ද ඔවුන්ගෙන් බේරී පළා ගොස් ඇති බවට පැමිණිල්ලක් ලැබී තිබෙනවා.

එදින ම උදෑසන වයස අවුරුදු 8ක දැරියක පාසල් අවසන්ව නිවස බලා යද්දී ත්‍රීවීලරයකින් පැමිණි පිරිසක් ඇයට චොක්ලට් එකක් ලබා දී ඇය පැහැරගෙන යාමට උත්සහ දරා ඇති අතර ඇය ඔවුන්ගෙන් මිදී පළා ගොස් තිබෙනවා.

කෙසේ වෙතත්, මේ සම්බන්ධයෙන් ක්‍රියාත්මක වූ මෙම දරුවන්ගේ මවුපියන් මේ බව මන්නාරම පොලිසියට දැනුම් දීමෙන් පසු පාසල් විදුහල්පතිවරුන්, යුද්ධ හමුදා සහ සිවිල් හමුදා සාමාජිකයන් සමග සාකච්ඡාවක් ද පවත්වා පාසල් සිසුන්ට විශේෂ ආරක්ෂාවක් ලබා දීමට කටයුතු කර තිබෙනවා

මේ අතර, පයින් ගමන් කිරීමේදී තනි තනිව ගමන් නොකරන ලෙසට ත් සිසුන්ට ද උපදෙස් ලබා දී පැමිණිලි සම්බන්ධයෙනුයි පොලිසිය වහා පුළුල් පරීක්ෂණයක් ආරම්භ කර ඇත්තේ.

පසුව මෙම සිද්ධීන් තුන වෙන වෙනම විමර්ශන සිදුකොට සීසීටීවී කැමරා පරීක්ෂා කිරීමේදී එවන් පැහැර ගැනීමක් හෝ සිදුවීමක් සිදුව නැති බව විමර්ශන නිලධාරීන්ට පෙනී ගොස් තිබෙනවා.

ඉන් අනතුරුව සාක්ෂි සටහන් කර ගැනීමේදී ද මෙවන් පැහැර ගැනීමක් සිදුව නැති බව අනාවරණය වී තිබෙනවා.

මේ නිසා මෙම පැමිණිලි කිසිවකුගේ බලපෑමක් මත සිදුවූවක් ද යන්න සොයා ගැනීම සඳහා මේ වන විට විමර්ශන අරඹා තිබෙනවා.

එමෙන්ම පැමිණිලි පිළිබඳ සැකයක් එල්ල වීම නිසාත් මෙම පැමිණිලි ව්‍යාජ පැමිණිලි වීම නිසාත් පැමිණිලිකරුවන්ගෙන් නැවත ප්‍රකාශ ලබා ගැනීමක් සිදු කරන බව පොලිස් ආරංචි මාර්ග සඳහන් කළා.