ජනපති උපදෙස් දුන්නත් ගම්පහ ඩෙංගු මර්ධනය නිසියාකාරව සිදු නොවන බවට චෝදනා !

ඩෙංගු අධි අවදානම් සහිත ගම්පහ දිස්ත්‍රික්කය තුළ ඩෙංගු මර්ධන වැඩසටහන් වහාම ක්‍රියාත්මක කරන ලෙස ජනාධිපතිවරයා විසින් උපදෙස් ලබා දී ඇතත් කිසිම නව වැඩසටහනක් ක්ෂේත්‍රය තුළ ක්‍රියාත්මක නොවන බව මහජන සෞඛ්‍ය පරීක්ෂවරු හෙළිදරවු කරති.
කිසිම වැඩපිළිවෙළක්, සම්බන්ධීකරණයක් හෝ ප්‍රතිපාදනයක් වෙන් වී නැති බව පෙන්වා දෙන ඔවුන් පවසන්නේ ඊයේ දිසාපතිවරයාගේ මූලිකත්වයෙන් දිස්ත්‍රික් සම්බන්ධීකරණ කමිටුවේ සභාපති ඇතුළු සෞඛය බලධාරීන් සහිතව පැවති රැස්වීමේ දී ක්‍රියාත්මක කළ යුතු වැඩසටහන සම්බන්ධව මහජන සෞඛ්‍ය පරීක්ෂකයින්ගෙන් සැලසුමක් ඉල්ලූ බවය.

ඉදිරිපත් කරන සැලසුමට උදව් කිරීමට හැකි බව එම බලධාරීන් දන්වා ඇත.

“ හැම තැනම රැස්වීම් තියනවා අපේ දත්ත අරන් ගිහින් ප්‍රසන්ටේෂන් තියනවා. යෝජනා කරනවා. ඒත් ඒ යෝජනා කිසිම දෙයක් මේ වනවතුරු බිම් මට්ටමේ ක්‍රියාත්මක වෙන්නේ නෑ. වෙන එකම දේ අපි වෙනදා ගිහින් කරන විදිහට ඩෙංගු කීටයන් බෝවන ස්ථාන සම්බන්ධව ගෙවතු හා නිවාස පරීක්ෂාව විතරයි.”

“ සමහර තැන් තියනාව ධූමායනය කරන්න අවශ්‍ය… ඒ සඳහාවත් මෙතෙක් ප්‍රතිපාදන නෑ. ඕක තමයි ගම්පහ ඩෙංගු මර්ධනය ගැන කියන කතාවල ඇත්ත තත්ත්වය. “