සමලිංගික ක්‍රියාවන් සාපරාධී ක්‍රියාවන් ලැයිස්තුවෙන් ඉවත් කිරීම සඳහා ගෙන ආ පනත් කෙටුම්පත ආණ්ඩුක්‍රම ව්‍යවස්ථාවට පටහැනි නොවන බව ශ්‍රේෂ්ඨාධිකරණය තීන්දු කර තිබෙනවා.
ආණ්ඩුක්‍රම ව්‍යවස්ථාවේ 121(1) වගන්තිය ප්‍රකාරව ශ්‍රේෂ්ඨාධිකරණයේ අභියෝගයට ලක් වූ “දණ්ඩ නීති සංග්‍රහය (සංශෝධන)” පනත් කෙටුම්පත සම්බන්ධයෙන් ශ්‍රේෂ්ඨාධිකරණයේ තීරණය තමාට ලැබුණු බව කථානායක මහින්ද යාපා අබේවර්ධන මහතා අද (09) පාර්ලිමේන්තුවට ප්‍රකාශ කළේය.
මෙම පනත් කෙටුම්පත සමස්තයක් ලෙස හෝ එහි යම් විධිවිධානයක් ආණ්ඩුක්‍රම ව්‍යවස්ථාවට පටහැනි නොවන බව ශ්‍රේෂ්ඨාධිකරණයේ මතය බව කථානායකවරයා මෙහිදී පාර්ලිමේන්තුවට දැනුම් දුන්නා.
දණ්ඩ නීති සංග්‍රහයේ 365 සහ 365 (A) වගන්ති සංශෝධනය කිරීම සඳහා වූ පෞද්ගලික මන්ත්‍රී පනත් කෙටුම්පතක් ලෙස ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී ප්‍රේම්නාත් සී. දොලවත්ත මහතා විසින් මෙම පනත් කෙටුම්පත ඉදිරිපත් කරනු ලැබූවා.
පසුව එය කැබිනට් මණ්ඩලය විසින් අනුමත කර රජයේ ගැසට් පත්‍රයේද මුද්‍රණය කළා.
මෙම ශ්‍රේෂ්ඨාධිකරණ තීරණයෙන් පසු පනත් කෙටුම්පත පාර්ලිමේන්තුවේ සරල බහුතරයකින් අදාළ පනත සම්මත කිරීමේ හැකියාව පවතිනවා.