කෝටිපති ව්‍යාපාරික දිනේෂ් ෂාෆ්ටර් මහතාගේ මරණය සම්බන්ධයෙන් ඉදිරි විමර්ශන පිළිබඳව අද (08) අපරාධ පරීක්ෂණ දෙපාර්තමේන්තුව විසින් කොළඹ ප්‍රධාන මහේස්ත්‍රාත්වරයාට කරුණු වාර්තා කර තිබෙනවා.
එහිදී අපරාධ පරීක්ෂණ දෙපාර්තමේන්තුව පවසා ඇත්තේ ෂාෆ්ටර් මහතාගේ මෝටර් රථයේ තිබී සොයාගත් ආගන්තුක රුධිර සාම්පලය කාගේදැයි නිශ්චිතව අනාවරණ කරගැනීම සඳහා ඔහු රෝහල්ගත කළ දින ජාතික රෝහල් සේවය කළ කාර්ය මණ්ඩල සේවකයන් කිහිප දෙනකු ඇතුළු 10 දෙනෙකුගේ රුධිර සාම්පල ලබාගැනීමට කටයුතු කරන බව අපරාධ පරීක්ෂණ දෙපාර්තමේන්තුව අද කොළඹ ප්‍රධාන මහේස්ත්‍රාත් ප්‍රසන්න අල්විස් මහතාට දැනුම් දුන්නා.
එම දෙපාර්තමේන්තුව අධිකරණයට වැඩිදුරටත් සඳහන් කර ඇත්තේ පෙර සතියේ ලබාගත් අධිකරණ නියෝග අනුව පොලිස් නිලධාරීන් ඇතුළු 21 දෙනෙකුගෙන් ලබාගත් රැධිර සාම්පල පරීක්ෂණ සඳහා රජයේ රස පරීක්ෂකවරයා වෙත යොමු කර ඇති බවයි.
ඒ අනුව මෙම නඩුව ලබන 24 වනදා යළි කැඳවන බව සඳහන්.