නයිජීරියානු තෙල් අටලුවකින් බොරතෙල් ලබාගැනීමට තැත්කිරීමේ චෝදනාව මත අත්අඩංගුවට ගැණුනු ශ්‍රී ලාංකිකයින් 8දෙනෙකු ඇතුළු 26 දෙනෙකුගෙන් සමන්විත නාවික කාර්ය මණ්ඩලය නිදහස් කිරීමට නයිජිරියානු අධිකරණය නියෝග කර තිබේ.
පසුගිය වසරේ අගොස්තු මසදී ශ්‍රී ලාංකිකයින් ඇතුළු පිරිස අත්අඩංගුවට ගනු ලැබුවේ, සමක ගිනියා රාජ්‍යයට අයත් මුහුදු සීමාවේදීය.
2020 දී ඉදිකළ මාෂල් දූපත් ධජය යටතේ ලියාපදිංචි කර MT HEROIC IDUN (හරොඉක් ඉඩුන්) බොරතෙල් නෞකාව පසුගිය වසරේ අගෝස්තු මස නයිජීරියාව බලා යාත්‍රා කරමින් තිබුණි.
දිගින් මීටර් 336ක් වන නෞකාව මෙහෙයවනු ලබන්නේ HUNTER GROUP ASA සමාගම විසිනි.
සමක ගිනියාවෙන් සහ නයිජීරියාවෙන් බොරතෙල් ලබාගැනීම සඳහා නෞකාව අගෝස්තු මස 8 වැනිදා නයිජීරියාව බලා යාත්‍රා කළේය.
එහිදී නයිජීරියා බලධාරින්ගෙන් ඉල්ලීමක් මත මේ නෞකාව අගෝස්තු 12 වනදා සමක ගිනියා නාවික හමුදාව සිය භාරයට ගනු ලබයි.
ඒ ශ්‍රී ලාංකිකයින් අටදෙනකු ඇතුළත් කාර්ය මණ්ඩල සාමාජිකයින් 26 දෙනා ද සමගිනි.
මෙම නෞකාවේ කපිතාන්වරයා ඉන්දීය ජාතිකයෙකු වන අතර සෙසු කාර්යමණ්ඩල සාමාජිකයින් පෝලන්ත, ඉන්දියා සහ පාකිස්තාන ජාතිකයින්ය.
ඔවුන්ට එල්ලවූ චෝදනාව වූයේ පෙර දැනුම්දීමකින් තොරව සමක ගිනියානු සාගර කලපයේ යාත්‍රා කිරීම, නයිජීරියා මුහුදු සීමාවේ අනවසරයෙන් යාත්‍රා කිරීම, සමුද්‍රීය අපරාධයක් කිරීමට කුමන්ත්‍රණය කිරීම සහ බොරතෙල් නීතිවිරෝධී ලෙස ගනුදෙනු කිරීමට උත්සාහ කිරීමය.
ඔවුන් පසුව නයිජීරියාවේ පෝර්ට් හාකෝට්හි අධිකරණයට ඉදිරිපත් කළ අතර බලයලත් අධිකාරියකින් තොරව නයිජීරියාවේ බොරතෙල් ගනුදෙනු කිරීම ඔවුන්ට එල්ල වූ චෝදනාව වුණි.
එහිදී චෝදනාව ප්‍රතික්ෂේප කළ නාවිකයින් අධිකරණයට පැවසුවේ, නයිජීරියාවට යනවිට තමන් සතුව බොරතෙල් නොතිබූ බවත්, මුහුදු කොල්ලකරුවන්ගෙන් බේරීම සඳහා මෙම මුහුදු සීමාවට පැමිණි බවය.
එහිදී ඇප නොලැබූ නාවිකයින් 26දෙනා මාස 8කට පසුව ඊයේ පෝර්ට් හාකෝට්හි මහාධිකරණයට ඉදිරිපත් කරනු ලැබීය.
එහිදී නෞකාව සහ කාර්යමණ්ඩලය නිදහස් කෙරුණත්, එක් චෝදනාවකට වරද පිළිගැනීම හේතුවෙන් නයිජිරියානු අධිකරණය විසින් අමෙරිකානු ඩොලර් 11,000කට ආසන්න දඩයක් නෞකාව අයත් සමාගමට ගෙවන ලෙසට නියෝග කර තිබේ.
එමෙන්ම නාවික සමාගම විසින් තවත් ඩොලර් මිලියන ගණනකට ආසන්න ගෙවීමක් සඳහා අධිකරණය සමග එකඟතාවයට පැමිණ ඇති බව වාර්තා වෙයි.
කෙසේවෙත්ත එම නෞකාව පසුගිය වසරේ නොවැම්බර් මස සිට නයිජිරියාවේ, පෝර්ට් හාකෝට්වලින් ඔබ්බේන් ඇති මුහුදේ නැංගුරම් ලා තිබු අතර මාස 6කට ආසන්න කාලයක් නැංගුරම් ලා තිබීමෙන් පසු නෞකාව නඩත්තු කිරීමට සිදුව ඇති බව වාර්තා වෙයි.
එම නඩත්තුවෙන් පසු නෞකාව නයිජීරියානු මුහුදෙන් පිටවන්නේ කවදා ද? යන්න මෙතෙක් අනාවරණ වී නොමැත.