ගැටුමක් හේතුවෙන් පහරකෑමට ලක්වී අනුරාධපුර ශික්ෂණ රෝහලට ඇතුළත් කළ 24 හැවිරිදි තරුණයෙක් රෝහල තුළ ප්‍රතිකාර ගනිමින් සිටියදි අද (28) අළුයම නාඳුනන ඝාතකයෙක් කපා කොටා ඝාතනය කර තිබේ.
ඝාතකයා තරුණයාගේ ගෙල කපා පාදයකට ද කොටා පළා ගොස් ඇති බව පොලිසිය කියයි.
මැදවච්චිය, මන්නාරම් හන්දිය ප්‍රදේශයේ පදිංචිව සිටි ඝාතනයට ලක් වූ තරුණයා ඊයේ අනුරාධපුර ශික්ෂණ රෝහලට ඇතුළත් කර ඇත්තේ පුද්ගලයින් කීප දෙනෙකුගේ පහරකෑමට ලක්වීම හේතුවෙනි.
ඊයේ සවස රෝහලේ 11 වැනි වාට්ටුවට ඇතුළත් කළ මෙම තරුණයා පසුව වැඩිදුර ප්‍රතිකාර සඳහා රෝහලේ මහාචාර්ය ඒකකයේ ශල්‍ය වාට්ටුව වන 66 වැනි වාට්ටුවට ඇතුළත් කර තිබේ.
රෝහල් කාර්ය මණ්ඩලය වහාම මෙම තරුණයාව දැඩි සත්කාර ඒකකයට ඇතුළත් කළත් ඒ වනවිටත් ඔහු මියගොස් සිට ඇත.