උෂ්ණත්වයෙන් ආරක්ෂා වෙන්න පාසල් සිසුන්ට මාර්ගෝපදේශ මාලාවක් !

පවතින අධික උෂ්ණත්වය මත පාසල් සිසුන් අනුගමනය කළ යුතු මාර්ගෝපදේශ මාලාවක් සෞඛ්‍ය අමාත්‍යාංශය විසින් නිකුත් කර තිබෙනවා.

අධ්‍යාපන අමාත්‍යාංශය වෙත මෙම මාර්ගෝපදේශ මාලාව යොමු කර ඇති බවයි වාර්තා වන්නේ.

ඒ අනුව මේ සම්බන්ධයෙන් අවධානයෙන් කටයුතු කරන ලෙසයි පාසල් ප්‍රධානීන් වෙත උපදෙස් ලබාදී ඇත්තේ.

මෙහිදී අධික උෂ්ණත්වය පවතින අවස්ථාවක අහිතකර ප්‍රතිඵල ඇති විය හැකි බවට සෞඛ්‍ය අමාත්‍යාංශය පෙන්වා දෙනවා.

එම අමාත්‍යාංශය සඳහන් කරන්නේ දහඩිය දැමීම හේතුවෙන් විජලන සහ ලවන ඉවත් වීම හේතුවෙන් ඇති වන මස් පිඩු පෙරලීම, අධික මහන්සිය සහ ආඝාත තත්ත්වයන් ඉහළ යාම මෙහි බරපතළ තත්ත්වයක් බවයි.

මේ අනුව එවැනි අවස්ථාවල පාසල් ක්‍රියාකාරකම්වල නිරත වීමේදී අධික උෂ්ණත්වය පවතින දිනවල සිසුන් එළිමහනේ හෝ ක්‍රීඩා පිටියේ ක්‍රියාකාරම්වල යෙදීමෙන් වැළකිය යුතු වනවා.

තවද සිසුන් විවේක කාලයේ දී දැඩි හිරු එළිය සහිත එළිමහනේ ගත කිරීම හා ක්‍රීඩා කිරීමෙන් වළකින ලෙස සෞඛ්‍ය අමාත්‍යාංශය දැනුම් දී තිබෙනවා.

වැඩිපුර ජලය පානය හා වෙහෙස නිවා ගැනීම සඳහා කෙටි විවේක කාල දෙකක් ලබාදීම වඩාත් සුදුසු බවද එම නිවේදනයේ සඳහන් වනවා.

සෞඛ්‍ය අමාත්‍යාංශය පෙන්වා දෙන්නේ අත්‍යවශ්‍ය නොවන අවස්ථාවල දී සිසුන් පාසලෙන් ඉවතට යැවීම වළක්වා ගත යුතු බවයි.

ඊට අමතරව අධික උෂ්ණත්වය සහිත දිනවල නිවාසාන්තර ක්‍රීඩා හා පුහුණුවීම් නැවැත්විය යුතු බව ද සෞඛ්‍ය අමාත්‍යාංශය විසින් නිකුත් කළ මාර්ගෝපදේශ මාලාවේ සඳහන් වනවා.