ඔට්ටු සහ සුදූ බද්ද ඉහළ දැමීමට අදාළ පනත් කෙටුම්පත ගැසට් මඟින් ප්‍රකාශයට පත්කර තිබෙනවා.
මුදල් අමාත්‍යවරයා ලෙස ජනාධිපති රනිල් වික්‍රමසිංහ මහතා විසින් මෙම ගැසට් පත්‍රය නිකුත් කර ඇති බවයි වාර්තා වන්නේ.
ඒ අනුව ලාංකික පුරවැසියෙකුගෙන් සුදූ ස්ථානයකට ඇතුළු වීමේදී අයකළ ඇමෙරිකානු ඩොලර් 50ක මුදල ඩොලර් 100ක් දක්වා ඉහළ දමා තිබෙනවා.
ඊට අමතරව එම බුකී ව්‍යාපාර පවත්වාගෙන යනු ලබන සෑම පුද්ගලයෙකුම එය ආරම්භ කළ දින සිට මසක් ඇතුළත දේශීය ආදායම් දෙපාර්තමේන්තුවේ ලියාපදිංචි විය යුතු වනවා.
මේ අතර වාර්ෂිකව ගෙවිය යුතු ඔට්ටු සහ සුදූ බදු මුදලද සංශෝධනය කිරීමට යෝජනා කර තිබෙනවා.
ඒ අනුව අප්‍රේල් පළමු වනදා සිට ආරම්භ වන බුකී ව්‍යාපාර සඳහා අය කරන වාර්ෂික බදු මුදල රුපියල් මිලියන 05 දක්වා ඉහළ දමා ඇති බවයි වාර්තා වන්නේ.
එමෙන්ම සජීවි රූපවාහිනි විකාශන පහසුකම් භාවිතාකරන අවස්ථාවක එම බදු මුදල් ප්‍රමාණය රුපියල් මිලියනයක් දක්වා ඉහළ දමා ඇති අතර මීට පෙර එම අගය පැවතියේ රුපියල් ලක්ෂ 06ක් ලෙසයි.