හෙදියක ලබා දුන් කිරි කෝප්පයක් පානය කිරීමෙන් පසුව වෛද්‍යවරයකු රෝගාතුර වූ බව කියන සිදුවීමක් සම්බන්ධයෙන් මේ වන විට විමර්ශන ආරම්භ කර තිබේ.
මිද්දෙණිය කාරියමඩිත්ත රෝහලේ සේවය කරන වෛද්‍යවරයකු මෙලෙස රෝගාතුර වී ප්‍රතිකාර ලබා ගැනීමට ඉකුත් 7 වැනිදා තංගල්ල මූලික රෝහලට ඇතුළත් වී තිබිණි. ඔහු මහරගම පදිංචි 53 හැවිරිදි අයකු වන බව කියයි.
මෙම වෛද්‍යවරයා රාජකාරි කරන අවස්ථාවේදී රෝහලේ හෙදියක විසින් කිරි කෝප්පයක් ලබාදී ඇතැයි කියයි. එය පානය කළ වෛද්‍යවරයා රාජකාරි නිමවී නිල නිවාසයට ගොස් ඇති අතර පසුදින පෙරවරු 9.00 පමණ වනතුරුත් සුපුරුදු පරිදි රෝහලට නොපැමිණීම හේතුවෙන් රෝහල් කාර්ය මණ්ඩලයේ සේවයකු ගොස් ඔහු ගැන සොයාබලා ඇත. එම වෛද්‍යවරයා අයහපත් සෞඛ්‍ය තත්ත්වයෙන් සිටීම හේතුවෙන් ප්‍රතිකාර සඳහා තංගල්ල මූලික රෝහලට ඇතුළත් වී තිබිණි.
පොලිසිය සැකකරන්නේ කිසියම් විෂ ද්‍රව්‍යයක් ශරීරගත වීම හේතුවෙන් වෛද්‍යවරයා රෝගී වී ඇති බවයි. කෙසේ වුවද මේ වන විට වෛද්‍යවරයා යහපත් සෞඛ්‍ය තත්ත්වයෙන් සිටින බව කියයි.
පරීක්ෂණ කටයුතු සඳහා වෛද්‍යවරයාගේ රුධිර සාම්පල යවා ඇති බවත්, මේ සම්බන්ධයෙන් දකුණු පළාත් සෞඛ්‍ය සේවා අධ්‍යක්ෂ කාර්යාලයෙන් විමර්ශනයක් ආරම්භ කර ඇති බවත් හම්බන්තොට දිස්ත්‍රික් සෞඛ්‍ය සේවා අධ්‍යක්ෂිකා වෛද්‍ය දීපිකා පටබැඳිගේ පැවැසුවේය.