දිවයින පුරා නැවතත් දිගු ඉන්ධන පෝලිම් – රජයෙන් විශේෂ නිවේදනයක් (VIDEO)

මේ වන විට රට පුරා බොහෝ ප්‍රදේශයන්හි ඉන්ධන පිරවුම්හල් ඉදිරිපිට දීර්ඝ ඉන්ධන පෝලිම් දක්නට ඇති බව වාර්තා වෙනවා.

ඒ ලංකා ඛනිජ තෙල් සංස්ථාවේ වෘත්තීය සමිති විසින් ආරම්භ කරන ලද වැඩ වර්ජනය හේතුවෙන් ඉන්ධන සැපයුම බිද වැටීමත් සමඟ යි.

ඉන්ධන පිරවුම්හල හිමියන් සඳහන් කරන්නේ තම පිරවුම්හල් බොහෝමයක ඉන්ධන මේ වනවිට අවසන් වී ඇති අතර වර්ජනය හේතුවෙන් වාහන හිමියන් ඉන්ධන ලබාගැනීම සඳහා වෙනදාට වඩා උනන්දුවක් දක්වන බවයි.

වර්ජනය අවසන් නොවුවහොත් ඉන්ධන සැපයුම ගැටලුකාරී තත්ත්වය ඇති වන බවයි ඔවුන් කියන්නේ.

වර්ජනය සඳහා එක්වී නැති LIOC පිරවුම් හල වෙත ද දිගු පෝලිම් ඇති බවයි දක්නට ඇත්තේ.

එහෙත් ඔවුන්ට ද ඉන්ධන ඉල්ලුමට අවශ්‍ය පරිදි සැපයුම ලබාදීමට නොහැකි බව වාර්තා වෙනවා.

ලංකා ඛනිජ තෙල් නීතිගත සංස්ථාව සතු ඉන්ධන හල ඇතුළු දේ පුද්ගලීකරණය කිරීමට එරෙහිවයි ඛනිජ තෙල් සේවකයන් මෙම විරෝධතාවය ආරම්භ කර තිබෙන්නේ.

විදුලිබල හා බලශක්ති අමාත්‍යාංශය සඳහන් කරන්නේ මෙරට ඉන්ධන වෙළඳපොළට තවත් රටවල් තුනක සමාගම් තුනක් පැමිණෙන බවයි.

එම සමාගම් තුන සඳහා දැනට ඛනිජ තෙල් සංස්ථාව සතු ඉන්ධන පිරවුම්හල් 450ක් ලබාදීමටද කැබිනට් අනුමැතිය හිමි වී තිබෙනවා.

මේ අතර ජනාධිපති මාධ්‍ය ඒකකය ද නිවේදනයක් නිකුත්කරමින් පවසන්නේ, කිසිදු ඉන්ධන හිඟයක් රට තුළ නොමැති බවය.

මේ හේතුවෙන් ඉන්ධන ලබාගැනීම සඳහා අනවශ්‍ය ලෙස ඉන්ධන පිරවුම්හල් අසළ පෝලිම්වලට රැස් නොවන ලෙසටද ජනාධිපති මාධ්‍ය ඒකකය විසින් වැඩිදුරටත් ජනතාවගෙන් ඉල්ලා සිටී.