2015 මැයි මස 15 වැනි දින සිට ක්‍රියාත්මක වූ මුදල් අමාත්‍යංශය මඟින් නිකුත් කළ චක්‍රලේඛය අනුව ප්‍රකාශයට පත් කළ රාජකාරී විදේශ ගමන් සඳහා විනිමය මුදාහැරීම හා ඒ ආශ්‍රිත වියදම් සීමා කිරීමට තීරණය කර ඇතැයි මුදල් අමාත්‍යාංශ ආරංච් මාර්ග පවසනවා.
ඒ අනුව, අනියම් දීමනා ගෙවීමේදී අධ්‍යයන, පුහුණු, සාකච්ඡා, සම්මන්ත්‍රණ ආදී කුසලතා සංවර්ධනයට අදාළ විදෙස් ගතවීමේදී එක්දිනකට අමෙරිකානු ඩොලර් 40ක් බැගින් උපරිම දින 30ක් සඳහා වූ දීමනාව අමෙරිකානු ඩොලර් 25ක් දක්වා අඩු කර දින 15ක් දක්වා සීමා කිරීමට පියවර ගෙන ඇති බවයි සඳහන් වන්නේ.
එමෙන්ම නිල දූත කාර්යන් හෝ වෙනයම් විදෙස් රාජකාරී කටයුත්තක් සඳහා රජය නියෝජනය කිරමින් විදෙස් ගතවීමේදී එක්දිනකට අමෙරිකානු ඩොලර් 75ක් බැගින් උපරිම දින 15ක් සඳහා වූ දීමනාව ද අමෙරිකානු ඩොලර් 40ක් දක්වා අඩු කර දින 10ක් දක්වා සීමා කිරීමටද පියවර ගෙන තිබෙනවා.
සංයුක්ත දීමනා ගෙවීමේදී රටවල් කාණ්ඩ පහක් යටතේ පළමු හා දෙවන ගණය යටතේ ගෙවීම් සිදු කළ සියළු දීමනාවන් 30% කින් අඩු කිරීමටද තීරණය කර ඇති බවයි සඳහන් වන්නේ.
ඒ අනුව, අමාත්‍යවරුන්, පළාත් ආණ්ඩුකාරවරුන්, පාර්ලිමේන්තු මන්ත්‍රීවරුන්, පළාත් සභා අමාත්‍යවරුන් සහ සභාපතිවරුන්/ මහා නගර සභා පුරපතිවරුන් සහ ප්‍රාදේශීය සභා සභාපතිවරුන් මෙම සීමා කිරීම් හේතුවෙන් බලපෑමට ලක්වන බවයි වාර්තා වන්නේ.
එසේම නිල සංචාරයකදී දූත පිරිසට නායකත්වය දෙන අමාත්‍යවරයාගේ හෝ අමාත්‍යාංශ ලේකම්වරයාගේ ඉල්ලීම පරිදි හිමිවන අමෙරිකානු ඩොලර් 750ක් වන සංග්‍රහ දීමනාවද සම්පූර්ණයෙන්ම අහෝසි කිරීමට පියවර ගෙන ඇති අතර මෙම වියදම් සීමා කිරීමේ තීරණය මාර්තු මස 20 වැනිදා සිට ක්‍රියාත්මක කිරිමට නියමිතයි.