ඡන්දය ගැන අධිකරණ දුන් නියෝගය පිළිබඳව  මුදල් රාජ්‍ය ඇමතිගෙන් විශේෂ ප්‍රකාශයක් !

පළාත් පාලන ඡන්ද විමසීම සඳහා අයවැයෙන් වෙන්කර ඇති මුදල් රඳවා ගැනීම වළක්වාලමින් ශ්‍රේෂ්ඨාධිකරණය විසින් ලබාදුන් තීන්දුව අනුව කටයුතු කරන බව මුදල් රාජ්‍ය අමාත්‍ය රංජිත් සියඹලාපිටිය මහතා පවසනවා.

“ඇත්තටම අධිකරණ තීන්දුවට අපි ඕන කෙනෙක් ගරු කරන්න ඕනේ. මුදල් අමාත්‍යාංශය වෙන්න පුළුවන්. රජය වෙන්න පුළුවන්. ආයතනයක් පෞද්ගලිකව වෙන්න පුළුවන්. අධිකරණ තීන්දුව පැහැදිලිකරගෙන කටයුතු කිරීම හැමදෙනාගෙම වගකීමක්. මුදල් අමාත්‍යංශය අනුව ඒ ගෞරවය අනුව කටයුතු කරනවා. එහි කිසිදු ගැටලුවක් දකින්නේ නෑ. අධිකරණ තීන්දුවක් අනුව කටයුතු කිරීම හැම කෙනෙක්ම බැඳිලා ඉන්න විශේෂ වගකීමක්. අධිකරණ තීන්දුව අනුව වියදම් පෙළගැස්සවීමක් කරන්න සිදුවේවී.”

මැතිවරණ සඳහා 2023 අයවැයෙන් වෙන්කර ඇති මුදල් රඳවා තබා ගැනීම අත්හිටුවන්නැයි ශ්‍රේෂ්ඨාධිකරණය විසින් ඊයේ (03) භාණ්ඩාගාර ලේකම්වරයාට හා ජනාධිපතිවරයා වෙනුවෙ නීතිපතිවරයාට අතුරු නියෝගයක් නිකුත් කර තිබෙනවා.

ඒ සමගි ජන බලවේගයේ මහ ලේකම් රංජිත් මද්දුමබණ්ඩාර විසින් ගොනු කළ මූලික අයිතිවාසිකම් පෙත්සම සැලකිල්ලට ගනිමින්.

ඊට අමතරව රජයේ මුද්‍රණාලය සඳහා ලබා දිය යුතු මුදල් රඳවාගැනීම අත්හිටුවමින් අතුරු නියෝගයක් ද නිකුත් කෙරුණා.