රාජ්‍ය නොවන සංවිධානයක් විසින් රත්නපුර – රක්වාන ප්‍රදේශයේ පවත්වාගෙන යන ළමා නිවාසයක දැරියන් 11 දෙනෙකු අපයෝජනයට ලක්කිරීමේ චෝදනාව මත එම ළමා නිවාස පාලිකාවගේ 60 හැවිරිදි සැමියා පැල්මඩුල්ල මහේස්ත්‍රාත්වරයා විසින් මාර්තු මස 08 වැනිදා දක්වා රක්ෂිත බන්ධනාගාරගත කර තිබේ.
ළමා නිවාසයේ වෙසෙන දැරියන් අපයෝජනයට ලක්වනබවට ලද පැමිණිල්ලකට අනුව පොලිසිය විසින් සිදුකළ විමර්ශනයක දී හෙළි වී ඇත්තේ මෙම ළමා නිවාසයේ සිටින දැරියන් 17 දෙනාගෙන් 11 දෙනෙක්ම මෙම පුද්ගලයා විසින් අපයෝජනය කර ඇති බවය.
අනතුරුව මෙම පුද්ගලයා ඊයේ අත්අඩංගුවට ගෙන පැල්මඩුල්ල මහේස්ත්‍රාත්වරයා හමුවට අද ඉදිරිපත් කිරීමෙන් අනතුරුව මාර්තු මස 08 වනදා දක්වා රක්ෂිත බන්ධනාගාරගත කිරීමට නියෝග කෙරිනි.
මෙම තැනැත්තා විසින් බරපතල ලෙස ලිංගික අපයෝජනයට ලක් කළ දැරියක් මේ වනවිට ප්‍රතිකාර සඳහා කහවත්ත රෝහලට ඇතුළත් කර තිබේ. පොලිස් ප්‍රකාශ සටහන් කරගැනීමෙන් අනතුරුව අනෙක් දැරියන්ද වෛද්‍යවරයෙකු වෙත ඉදිරිපත් කිරීමට නියමිතව තිබේ.