ළාත් පාලන ආයතන ඡන්ද විමසීමට ඉදිරිපත්වී සිටින රාජ්‍ය හා අර්ධ රාජ්‍ය සේවකයින් සම්බන්ධයෙන් අද (24) පාර්ලිමේන්තුවේ දී අවධානය යොමු විය.
එහිදි අදහස් දැක්වූ පාර්ලිමේන්තු මන්ත්‍රී මහාචාර්ය චන්න ජයසුමන මහතා පැවසුවේ මේවර පාළාත් පාලන මැතිවරණයට වැටුප් රහිතව රාජ්‍ය සේවකයින් 3,100ක් පමණ ඉදිරිපත් වී සිටන බවය.
මැතිවරණය පැවැත්වීම සම්බන්ධයෙන් නිවැරදී තීන්දුවක් මෙතෙක් ගෙන නොමැති බැවින් එම පිරිස වෙනුවෙන් ගන්නා තීරණය කුමක්ද යන්න පිළිබඳව එහිදී මන්ත්‍රීවරයා අග්‍රාමාත්‍යවරයාගෙන් ප්‍රශ්න කළේය.
“මේ පළාත් පාලන මැතිවණරයට 3,100ක් විතර රාජ්‍ය සේවකයින් ඉදිරිපත්වෙලා තියෙනවා නිවාඩු අරගෙන ඉදිරිපත්වෙලා තියෙනවා. ඔවුන් ඉන්නේ පඩි රහිතව. ජනාධිපතිතුමා ඊයේ පැවසුවා ඡන්දයක් නෑ කියලා. ඉතින් මම, රාජ්‍ය පරිපාලන ඇමතිවරයා විදියට අගමැතිවරයාගෙන් අහනවා මේ 3,100ක් වන රාජ්‍ය සේවකයෝ පඩි රහිතව ඉන්නවා. ඔවුන් පිළිබඳ ගන්න තීරණය මොකක්ද කියලා. “
මේ සම්බන්ධයෙන් සමගි ජන බලවේගයේ පාර්ලිමේන්තු මන්ත්‍රී රාජිත සේනාරත්න මහතා ද අදහස් දැක්වීය.
“3,000කට වැඩි පිරිසක් ඔක්කොම 7,100ක් විතර රාජ්‍ය සහ අර්ධ රාජ්‍ය සේවකයෝ මේ මැතිවරණයට නොයෙකුත් පක්ෂ වලින් සහ ස්වාධින කණ්ඩායම්වලින් නම් දීලා තියෙනවා. මේ මැතිවරණ ගැන තීන්දු ගන්නේ නැතිව මේ රාජ්‍ය සේවකයින්ට යම් සහනයක් ලබලාදෙන්න. නැතිනම් ඒ මිනිස්සුන්ට ගෙවල්වල කිසිදු ආදායමක් නෑ.”
එහිදී ශ්‍රී ලංකා පොදුජන පෙරමුණ පාර්ලිමේන්තු මන්ත්‍රී එස්. බී.දිසානායක මහතා පැවසුවේ එම රාජ්‍ය සේවකයන් සම්බන්ධයෙන් කැබිනට් මණ්ඩලයේ තීන්දුවක් මත නැවත සේවයට වාර්තා කළ හැකි බවය.
” මීට කලිනුන් ඒ වගේ ප්‍රශ්න වෙලා තියෙනවා. ඒ වගේ වෙලාවට කැබිනට් එක තීන්දුවක් අරගෙන ආපහු සේවයට වාර්තා කරන්න කියලා තියෙනවා. අගමැතිතුමා එක්ක කතා කරලා මේ අයට සේවයට වාර්තා කරන්න කැබිනට් එකට තීන්දුවක් ගන්න පුළුවන්. මීට ඉස්සෙල්ලත් අරගෙන තියෙනවා.”