ජනාධිපතිවරණය ගැන ශ්‍රී ලංකා නිදහස් පක්ෂය නව යෝජනාවක් සම්මත කරගනී !

හිටපු ජනාධිපති මෛත්‍රීපාල සිරිසේන මහතා යළිත් වරක් ජනාධිපති ධුරයට තරග කළ යුතු බවට වන යෝජනාවක් නිදහස් පක්ෂය විසින් සම්මත කරගෙන තිබේ.

ශ්‍රී ලංකා නිදහස් පක්ෂයේ සමස්ථ ලංකා කාරක සභා රැස්වීම අද (11) පෙරවරුවේ ඩර්ලි පාරේ පිහිටි පක්ෂ මූලස්ථානයේ දී පැවැත්විය.

මෙම කාරක සභාව පක්ෂ සභාපති හිටපු ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් පැවති අතර ඊට පක්ෂයේ ජ්‍යෙෂ්ඨයින් රැසක් එක්ව සිටි බව වාර්තා වෙයි.

මෙවර පළාත් පාලන මැතිවරණයට තරග කරන අපේක්ෂකයින් ද මීට එක්වී සිටි අතර එහිදී අදාළ යෝජනාව සම්මත වී ඇති බව වාර්තා විය.

රැස්වීමෙන් අනතුරුව මාධ්‍ය වෙත අදහස් දැක්වූ ශ්‍රී ලංකා නිදහස් පක්ෂ සභාපති, හිටපු ජනාධිපති මෛත්‍රීපාල සිරිසේන මහතා,

“අපි පළාත් පාලන මැතිවරණය ගැන සාකච්ඡා කරලා ආසන සංවිධායකයින්ගෙනුත් අදහස් විමසලා අද සිට වහාම මෙතෙක් ගෙන ගිය වැඩපිළිවෙල කාර්යක්ෂම කරන්න කියලා උපදෙස් දුන්නා.”

ප්‍රශ්නය – අද එකමතිකව තීන්දු වුණා ඔබතුමා නැවත ජනාධිපතිවරණයට ඉදිරිපත් වෙන්න සූදානම් කියලා ?

“මට මතක හැටියට එහෙම යෝජනාවකුත් ඉදිරිපත් වුණා වගේ. පක්ෂය කියනවා නම් මම පිළිගන්න ඕනේ.”

ප්‍රශ්නය – ආසන ගාණන වැඩි වෙයිද?

“අනිවාර්යයෙන්ම ආසන ගණන වැඩි වෙනවා. ගිය සැරෙට වඩා වැඩි වෙනවාමයි.”

ප්‍රශ්නය – 13 ගැන මේ දවස්වල කතා බහට ලක් වෙනවා නේද?

“මේවා පුළුල් සංකීර්ණ ප්‍රශ්න. මේ මැතිවරණයක් තියන වෙලාවේ 13 ගැන කතා කරන එක සුදුසු වන්නේ නෑ. අනවශ්‍ය ප්‍රශ්න මතුවෙනවා.”