සුළු පියාගේ අමානුෂික ප්‍රහාරයෙන් කුඩා දරුවෙක් මරුට !

කාත්තන්කුඩි ප්‍රදේශයේදී අමානුෂික ප්‍රහාරයකට ලක්වූ කුඩා දරුවෙකු ජීවිතක්ෂයට පත්ව තිබේ.

මෙලෙස ජීවිතක්ෂයට පත්ව ඇත්තේ 11 හැවිරිදි වියේ පසුවූ කුඩා පිරිමි දරුවෙකි.

දරුවාගේ මවගේ දෙවන විවාහයේ පුරුෂයා නිවස තුළදී දරුවාට මෙම ප්‍රහාරය එල්ලකර ඇති බවට පොලීසිය සැකපළ කරයි.

දරුවාගේ පියා විසින් පසුගිය 08 වනදා කාත්තන්කුඩි පොලීසියට පැමිණිල්ලක් සිදුකරමින් පවසා ඇත්තේ අදාළ සැකකරුගේ පහරකෑමට ලක්ව දරුවා මඩකලපුව රෝහලේ දැඩි සත්කාර ඒකකයට ඇතුළත් කර ඇති බවය.

ඒ අනුව වහාම ක්‍රියාත්මක වූ පොලීසිය විසින් සැකකාර සුළු පියා එදිනම අත්අඩංගුවට ගෙන ඇත.

මෙලෙස අත්අඩංගුවට ගෙන ඇත්තේ මාතලේ ප්‍රදේශයේ පදිංචි 26 හැවිරිදි වියේ පසුවන සැකකරුවෙකි.

ඊයේ (9) දින සැකකරු අධිකරණය වෙත ඉදිරිපත් කර ඇති අතර එහිදී නියෝග කර ඇත්තේ සැකකරු එළඹෙන 14 වනදා දක්වා රිමාන්ඩ් බන්ධනාගාරගත කරන ලෙසටය.

කෙසේ වෙතත් අමානුෂික ලෙස පහරකෑමට ලක්ව මඩකලපුව රෝහලේ දැඩිසත්කාර ඒකකයේ ප්‍රතිකාර ලබමින් සිටි දරුවා ඊයේ (09) දහවල් අවාසනාවන්ත ලෙස ජීවිතක්ෂයට පත්ව ඇති බව පොලීසිය පවසයි.

ඒ අනුව මෙම ඝාතනය සම්බන්ධයෙන් අද (10) දින පොලීසිය විසින් මඩකලපුව මහෙස්ත්‍රාත් අධිකරණය වෙත කරුණු වාර්තා කිරීමට නියමිතව ඇත.

සිද්ධිය සම්බන්ධයෙන් කාත්තන්කුඩි පොලීසිය වැඩිදුර විමර්ශන ආරම්භ කර තිබේ.