අමාත්‍යාංශ දෙපාර්තමේන්තු සංස්ථා මණ්ඩල සහ ආරක්ෂක අංශවලට අයත් වාහන 600ත් 700ත් අතර ප්‍රමාණයක් ඒවායේ ප්‍රධානීන්ගේ නිවෙස්වල කටයුතු සහ පෞද්ගලික අවශ්‍යතා වෙනුවෙන් යොදා ගැනීම නිසා වාර්ෂිකව රුපියල් කෝටි පන්සියයකට වැඩි මුදලක් නාස්ති වන බව රජයට තොරතුරු අනාවරණය වී තිබෙනවා.
මෙලෙස අවභාවිතා වන වාහන වැඩිම සංඛ්‍යාවක් ආරක්ෂක අංශවලට අයත් ඒවා බව වාර්තා වනවා.
මේ සම්බන්ධයෙන් කොපමණ උපදෙස් දුන්නත් වාහන අවභාවිතාව දිගින් දිගටම සිදුවන බව පෙනී යන්නේ යැයි මුදල් අමාත්‍යාංශ නිලධාරියෙක් පැවසුවා.
එකම උත්සවයට, එකම සාකච්ඡාවට එකම ආයතනයේ ප්‍රධානීන් තවමත් වෙන වෙනම වාහනවලින් පැමිණීම දිගින් දිගටම සිදුවන බවත් මේ හේතුවෙන් ද විශාල මුදලක් නාස්ති වන බවත් රජයට පෙනී ගොස් ඇතැයි ආරංචි මාර්ග සඳහන් කළා.
මේ තත්ත්වය සැලකිල්ලට ගෙන රජයේ වාහන පරිහරණය සම්බන්ධයෙන් අලු‍ත් උපදෙස් මාලාවක් ළඟදීම නිකුත් කිරීමට රජය බලාපොරොත්තු වන බවත් වාර්තා වනවා.
රජයේ ආයතනවල වාහන අවභාවිතාව පිළිබඳ තොරතුරු විගණන වාර්තාවල අද සුලබව දක්නට ලැබෙන බව පවසන මුදල් අමාත්‍යාංශය වාහන අවභාවිතා වැළැක්වීමට විගණනය ලබාදී ඇති නිර්දේශ පවා බොහෝ ආයතන ක්‍රියාත්මක කර නැතැයි පෙන්වා දෙනවා.