ශ්‍රී ලංකා සවි එසැවීමේ ජාතික ශූරතාවලියේදී ක්‍රීඩකයන් දෙනෙකු තහනම් උත්තේජක භාවිතා කර තරග වැදුණේ යැයි චෝදනා ලබා තරග තහනමකට ලක් ව තිබෙනවා.
ශරීරයේ බර අඩු කර ගැනීම සඳහා භාවිතා කරන ෆියුරොසෙමයිඩ් (Furosemide) නම් අන්තර්ජාතික තරග බිමේ තහනම් කොට ඇති උත්තේජකය එම ක්‍රීඩකයන් දෙදෙනා එන්නත් ලෙස ලබාගෙන තරගාවලියට සහභාගී වී ඇති බවයි පරීක්ෂණවලදී තහවුරු වී ඇත්තේ.
කොළඹ තරු පහේ හෝටලයකදී පසුගියදා පැවැති ශ්‍රී ලංකා සවි එසැවීමේ ජාතික ශූරතාවලියට පැමිණි ජාතික තහනම් උත්තේජක මර්දන නියෝජිතායතන නිලධාරීන් විසින් ක්‍රීඩකයන් අටදෙනකුගෙන් අහඹු ලෙස ලබාගත් මුත්‍රා සාම්පල කටාර්හී පිහිටා ඇති රසායානාගාරයකදී පරික්ෂාවකට ලක්කොට මේ බව තහවුරුකොට ගෙන තිබුණා.
එම කටාර් රසායනාගාරයේ වාර්තාව අනුව ක්‍රීඩකයන් දෙනෙකුගේ මුත්‍රා සාම්පල්වල පමණක් තහනම් උත්තේජක සංඝටක ඇති බවට තහවුරු වී තිබෙනවා.
මේ පිළිබඳව ක්‍රීඩකයන් දෙදෙනාට දැනුම් දී තාවකාලික තරග තහනමක් පැනවීමට ක්‍රියාකොට ඇති අතර, අනතුරුව ජාතික තහනම් උත්තේජක මර්දන නියෝජිතායතනය ක්‍රීඩකයන් දෙදෙනා කැඳවා මූලික පරීක්ෂණයක් සිදු කොට තිබෙන අතර එහිදී චෝදනාවට ලක්වූ ක්‍රීඩකයන් දෙදෙනා වරද පිළිගෙන තිබෙනවා.