ශ්‍රී ලංකාව සහ ඉන්දියාව අතර පැවති තෙවන එක්දින තරගයේ ජයද තමන් සතු කරගනිමින් ශ්‍රී ලංකාවට එරෙහි එක්දින තරගාවලිය තුනට බිංදුවක් ලෙස ජය ගැනීමට සත්කාරක ඉන්දීය කණ්ඩායම අද සමත් වුණා. ඒ ශ්‍රී ලංකා කණ්ඩායම ලකුණු 317කින් පරාජය කරමින්. තරගය පැවැත්වුනේ ග්‍රීන්ෆීල්ඩ් ක්‍රීඩාංගණයේදී.
තරගයේ කාසිය වාසිය දිනාගත් ඉන්දීය නායක රෝහිත් ශර්මා ප්‍රථමයෙන් පන්දුවට පහර දීමට තීරණය කල අතර ආරම්භක පිතිකරුවන් ලෙස පිටියට පිවිසි රෝහිත් ශර්මා සමඟින් ශුබ්මන් ගිල් ලකුණු 95ක සබඳතාවක් ගොඩනැගුවා.
නායක රෝහිත් ශර්මා ලකුණු 42ක් වාර්තා කල අතර විශිෂ්ඨ ඉණිමක් ක්‍රීඩා කල ශුබ්මන් ගිල් පන්දු 97කදී ලකුණු 116ක් රැස් කළා.එයට හතරේ පහර 14ක් සහ හයේ පහර දෙකක් ඇතුලත්.
විරාත් කෝලි නොදැවී ලකුණු 166ක් රැස් කලේ පන්දු 110කදී. එයට හතරේ පහර 13ක් සහ හයේ පහර 8ක් ඇතුලත්. ඒ අනුව ඉන්දීය කණ්ඩායම නියමිත පන්දු වාර 50 අවසානයේ කඩුලු 5ක් දැවී ලකුණු 390ක් රැස් කලා.
පන්දු යැවීමේදී ලහිරු කුමාර සහ කසුන් රාජිත කඩුලු 2 බැගින් හිමි කරගත් අතර චාමික කරුණාරත්න එක් කඩුල්ලක් දවා ගත්තා.
පිලිතුරු ඉනිම ක්‍රීඩා කිරීම සඳහා පිටියට පිවිසි ශ්‍රී ලංකා කණ්ඩායමට සියලු දෙනා දැවී රැස් කරගත හැකිවූයේ ලකුණු 73ක් පමණයි.
එහිදී නුවනිදු ප්‍රනාන්දු පන්දු 27ක් තුල ලකුණු 19ක් රැස් කලා. එයට හතරේ පහර 4ක් ඇතුලත්. කුසල් මෙන්ඩිස්ට රැස් කරගත හැකිවූයේ ලකුණු 4ක් පමණයි.
නායක දසුන් ශානක ලකුණු 11ක් රැස් කල අතර වනිදු හසරංග මොහොමඩ් සිරාජ්ගේ පන්දුවක් හමුවේ එක් ලකුණකට දැවී ගියා.කසුන් රාජිත නොදැවී ලකුණු 13ක් රැස් කළා.
පන්දු යැවීමේදී මොහොමඩ් සිරාජ් කඩුලු 4ක් දවා ගත් අතර මොහොමඩ් ශාමි සහ කුල්දීප් යාදව් අතර කඩුලු දෙක බැගින් බෙදී ගියා.
ඒ අනුව ශ්‍රී ලංකා කන්ඩායමේ කිසිදු ක්‍රීඩකයෙකුට ලකුණු 20 සීමාව ඉක්මවා යාමට ඉන්දීය පන්දු යවන්නන් අවස්ථාව ලබා නොදුන් අතර ශ්‍රී ලංකා කණ්ඩායමට 3-0ක් ලෙස එක්දින තරගාවලි පරාජයක් හිමිවුණා.