විදුලි ගාස්තු වැඩි කිරීමට සිදුවන්නේ විදුලි බල මණ්ඩලය මුහුණපා ඇති මූල්‍ය අර්බුදය පියවා ගැනීම සඳහා ඇති අවම හානිදායක ක්‍රමය එය නිසා බව විදුලි බල මණ්ඩලයේ සභාපති නලින්ද ඉලන්ගකෝන් පවසනවා.
ලංකා විදුලි බලමණ්ඩලය අධ්‍යනයක් සිදුකර අඛණ්ඩව විදුලි බලය ලබාදිය හැකි ක්‍රමවේදයක් සකස් කළ බවත් එය ක්‍රියාත්මක කිරීම සඳහා සම්පත් අවශ්‍ය බවයි ඔහු පෙන්වා දෙන්නේ.
ඒ අනුව ගල් අඟුරුවලට මුදල් ගෙවීමේදී දැඩි මූල්‍ය අර්බුදයක් ඇති බවත් ඛනිජ තෙල් සංස්ථාවද අත්පිට මුදල් නොමැති නම් තෙල් ලබා නොදෙන බවට දැනුම්දී ඇති බවයි සභාපතිවරයා සඳහන් කළේ.
මෙම වසරේ ජනවාරි 1 වනදා සිට ආණ්ඩුව විසින් කිසිඳු මුදලක් ලබා නොදෙන බවට ප්‍රකාශ කර ඇති බවත් විදුලි ගාස්තු වැඩි කිරීමක් සිදු නොකළ හොත් විශාල අර්බුදයකට ගමන් කිරීමට සිදුවන බවයි විදුලි බල මණ්ඩලයේ සභාපති නලින්ද ඉලන්ගකෝන් වැඩිදුරටත් සඳහන් කළේ.