පෝට් සිටියේ ප්‍රධාන විධායක ආගිය අතක් නෑ !

නව වසරේ පළමු වතාවට ඊයේ (05) සවස රැස්වූ පාර්ලිමේන්තුවේ රාජ්‍ය මුදල් පිළිබඳව කාරක සභාවට හිස් අතින් රැස්වීම අවසන් කිරීමට සිදුව ඇත. ඒ ඊයේ එම කාරක සභාවට ගෙන්වූ කොළඹ වරාය නගර ආර්ථික කොමිසමේ සාමාජිකයන් සමග සාකච්ඡා කිරීමට බලාපොරොත්තු වූ යෝජිත රෙගුලාසි පිළිබඳව සාකච්ඡා කිරීමට එහි සාමාජිකයන් සූදානමින් නොපැමිණීම හේතුවෙන් බව එහි සභාපති පාර්ලිමේන්තු මන්ත්‍රි ආචාර්ය හර්ෂ ද සිල්වා පවසයි.

මේ පිළිබඳව ඊයේ රාත්‍රි ට්විටර් පනිවිඩයක් නිකුත් කරමින් ආචාර්ය හර්ෂ ද සිල්වා මන්ත්‍රීවරයා පවසා තිබුණේ කොළඹ වරාය නගර ආර්ථික කොමිසමේ සාමාජිකයන්ගේ ක්‍රියා කලාපය කිසිදු වෘත්තීය භාවයකින් තොර සහ උද්‍යෝගයෙන් තොර වූ බවයි.

“ මෙහි සභාපතිවරයා විදේශගත වෙලා. ඔහුට සමාව දිය හැකියි. නමුත් ප්‍රධාන විධායක නිලධාරියාත් අතුරුදහන්. ඔහු දුරකථනයෙන්වත් ඔහු ව සම්බන්ධ කර ගන්න බැරිලු. කොමිෂන් සභා සාමාජික සාලිය වික්‍රමසූරිය මහතා වරාය නගරය රැක ගැනීම වෙනුවෙන් අද දින හැකි උපරිමයෙන් ක්‍රියා කළා. නමුත් මම හිතන ආකාරයට බිලියන 1.5ක මේ ආයෝජන ව්‍යාපෘතිය සාර්ථක විය යුතුයි. එ සඳහා වරාය නගර කොමිසමත් සාර්ථකව වැඩ කළ යුතුයි. මට හිතාගන්න බැහැ තවමත් 2023 ජනවාරි වෙලත් 2021 විගණන වාර්තා ඔවුන් තවමත් සකස් කර නැහැ. “ ආචාර්ය හර්ෂ ද සිල්වා එලෙස පවසා තිබුණි.