දැරියක් දූෂණය කිරීමේ සිද්ධියකට චීවරධාරියෙක් නීතිය හමුවට !

වයස අවුරුදු 14ක පාසල් දැරියක් දූෂණය කිරීමේ සිද්ධියක් වාර්තා විය.

මොණරාගල දොඹගහවෙල ප්‍රදේශයේ දී සිදුවූ එම අපරාධය සම්බන්ධයෙන් ප්‍රදේශයේ විහාරස්ථානයක චීවරධාරියෙකු ඇතුළු 04 දෙනෙකු දොඹගහවෙල පොලීසිය විසින් අත්අඩංගුවට ගෙන ඇත.

ජා-ඇළ ප්‍රදේශයේ පදිංචි එම දැරිය පාසල් නිවාඩු කාලයේදී දොඹගහවෙල ප්‍රදේශයේ පදිංචි සිය නැන්දනියගේ නිවස වෙත පැමිණ ඇති අතර එම කාලසීමාව තුළදී මෙම සිද්ධිය සිදුවී ඇති බවට මූලික විමර්ශනවලින් අනාවරණය වී ඇත.

සිය මිත්තනිය සහ නැන්දනිය සමගින් විහාරස්ථානය ට ගිය අවස්ථාවදී ඔවුන් දෙදෙනාගේ ද සහාය ඇතිව අදාළ චීවරධාරියා විහාරස්ථානය තුළදීම මෙම දැරියට ලිංගික අතවර සිදුකර ඇති බව අප වාර්තාකරු පැවසීය.

ඊට අමතරව එම චීවරධාරියාගේ සහෝදරයෙකු ද දැරියගේ නැන්දනියගේ නිවසටම ගොස් දැරියට ලිංගික අතවර සිදු කර ඇති බවද සිදු කළ පොලිස් විමර්ශනවලින් අනාවරණය වී ඇත.

සිද්ධිය සම්බන්ධයෙන් දොඹගහවෙල පොලීසියට ලද පැමිණිල්ලක් අනුව මෙම සිදුවීමට සම්බන්ධය චීවරධාරියා, ඔහුගේ සහෝදරයා සහ මෙම අපරාධය ට අනුබල දුන් නැන්දනිය සහ මිත්තනිය ද අත්අඩංගුවට ගෙන තිබේ.

සැකකරුවන් මොනරාගල මහෙස්ත්‍රාත් අධිකරණයට ඉදිරිපත් කිරීමෙන් අනතුරුව ජනවාරි මස 10 වනදා දක්වා රක්ෂිත බන්ධනාගාරගත කර ඇති අතර සිද්ධිය සම්බන්ධයෙන් දොඹගහවෙල පොලිස් ස්ථානයේ නිලධාරීන් ඉදිරි විමර්ශන සිදු කරයි.