රජයේ තනතුරු දරන බවට හැඳුනුම්පත් සකසා පුද්ගලයන් රට පන්නන ජාවාරමක් පාර්ලිමේන්තුවේ මන්ත්‍රීවරුන් කිහිප දෙනෙකු සිදු කරගෙන යන බව දූෂණ විරෝධී හඬ කැඳවුම්කරු, ජවිපෙ හිටපු පාර්ලිමේන්තු මන්ත්‍රී වසන්ත සමරසිංහ පවසයි.
පාර්ලිමේන්තු මන්ත්‍රී වරප්‍රසාද පාවිච්චි කරමින් මන්ත්‍රීවරුන් කිහිප දෙනෙකු මෙම ජාවාරම සිදු කර ගෙන යන බවත් දැනට පුද්ගලයන් හතළිහක් පමණ විවිධ රටවල්වලට පිටත් කර ඇති බව ත් හිටපු මන්ත්‍රීවරයා කියා සිටියි.
ඒ අනුව, ඉදිරියේදී මීට අදාළ පුද්ගලයන්ගේ ගුවන් ගමන් බලපත්‍රවල ඡායාරූප පිටපත් සහ රටවල් මොනවා ද යන්න හෙළි කරන බව ඔහු පවසයි.
වසන්ත සමරසිංහ පවසන්නේ, එක් පුද්ගලයකුගෙන් මේ සඳහා රුපියල් ලක්ෂ 30ත් 45ත් අතර මුදලක් අය කරන අතර එක් මන්ත්‍රීවරයෙකුගේ නමින් මෙම හැඳුනුම්පත සකසා ඇති බවයි.
අදාළ මන්ත්‍රීවරයා එම අදාළ පුද්ගලයා රටට රැගෙන ගොස් දිනකින් පසු මන්ත්‍රීවරයා පසු දින මෙරටට පැමිණෙන බව ද සමරසිංහ සඳහන් කරයි.
දැනට බ්‍රසීලය, කොරියාව, ජපානය වැනි රටවල්වලට මෙසේ පුද්ගලයන් පිටත් කර ඇති බවත් රාජ්‍ය නිලධාරීන් ලෙස මෙසේ හැඳුනුම්පත් සකසා මේ සිදු කරන ජාවාරමෙන් ලාංකේය ශ්‍රමිකයන්ට පිටරට යාමට තිබෙන අවස්ථාව අහිමි කරනවා පමණක් නොව මෙමගින් මෙරට කෙරේ ඇති කීර්තිය පළුදු වන බවත් වසන්ත සමරසිංහ පෙන්වා දෙයි.
ඉදිරියේදී මේ පිළිබඳව විශේෂ හෙළිදරව්වක් කිරීමට සූදානම් බව ද හෙතෙම වැඩිදුරටත් සඳහන් කරයි.