පුද්ගලයින් දෙදෙනෙකු අත්අඩංගුවට ගැනීමෙන් පසු ඔවුන්ගේ ඥාතීන් යැයි කියා ගන්නා පිරිසක් අඟුලාන පොලීසියට කඩාවැදීමත් සමඟ එහි උණුසුම්කාරී තත්ත්වයක් හටගෙන තිබෙනවා.
ඇතිවූ උණුසුම්කාරී තත්ත්වයත් සමඟ පොලිසියේ ආරක්ෂාව තර කිරීමට අවට පොලිස් ස්ථානවලින් ද පිරිස් ඊයේ රාත්‍රියේ කැඳවා ඇති බවයි වාර්තා වුණේ.
අත්අඩංගුවට ගෙන සිටි ‘ජොන්ටියා’ සහ ‘කලයා’ නැමැති සැකකරුවන් දෙදෙනාගේ ඥාතීන් යැයි කියා ගන්නා පිරිසක් පොලිසියට පැමිණ සැකකරුවන් රැගෙන ගොස් ඇති අතර, පොලිසිය විසින් සැකකරුවන් දෙදෙනාට පහර දුන් බව කියමින් ඔවුන් දෙදෙනා දකුණු කොළඹ ශික්ෂණ රෝහලට ඇතුළත්ව ඇති බවයි වාර්තා වන්නේ.
කෙසේ වෙතත් ඥාතීන් විසින් එලෙස රැගෙන යනු ලැබූ සැකකරුවන් දකුණු කොළඹ ශික්ෂණ රෝහලේ ප්‍රතිකාර ලබමින් සිටියදී අත්අඩංගුවට ගෙන ඇති බව සඳහන්.
මොවුන් දෙදෙනා ජංගම දුරකථනයක් හේතුවෙන් ආරවුලක් ඇතිකරගෙන ඇති අතර, පසුව ඔවුන් එම සිද්ධිය සමතයකට පත්කර ගැනීම සඳහා අඟුලාන පොලීසිය වෙත පැමිණ තිබෙනවා.
එහිදී අඟුලාන පොලිස් නිලධාරීන් මොවුන් දෙදෙනා අත්අඩංගුවට ගෙන ඇති අතර පසුව ඔවුන්ගේ ඥාතීන් පිරිසක් පැමිණ සැකකරුවන් රැගෙන යාමට කටයුතු කර ඇති බව සඳහන්.
කෙසේ වෙතත් එහිදී ඇති වූ උණුසුම්කාරී තත්ත්වය අතරතුර එක් පොලිස් නිලධාරීයෙකුටද තුවාල සිදුව තිබෙනවා.