ප්‍රකට ව්‍යාපාරික දිනේෂ් ෂාෆ්ටර් මහතාගේ මරණය දිවි නසා ගැනීමක්ද යන්න පිළිබඳව මේ වන විට විමර්ශකයින්ගේ අවධානය යොමුව ඇතැයි පොලිස් ආරංචිමාර්ග පවසයි.
මරණය සම්බන්ධයෙන් දැනටමත් පුද්ගලයින් 70ක පමණ පිරිසකගෙන් ප්‍රකාශ ලබාගෙන තිබෙනවා.
ප්‍රකට ව්‍යාපාරිකයෙක් සහ සමාගම් අධ්‍යක්ෂවරයෙක් වූ දිනේෂ් ෂාෆ්ටර් මහතාගේ මරණය සම්බන්ධයෙන් අපරාධ පරීක්ෂණ දෙපාර්තමේන්තුවේ මනුෂ්‍ය ඝාතන සහ සංවිධානාත්මක අපරාධ විමර්ශන කොට්ඨාසයෙන් විමර්ශන ක්‍රියාත්මකය.
ෂාෆ්ටර් මහතා සිය නැන්දම්මාට ලියන ලද ලිපියක් කෙරෙහි විමර්ශකයින්ගේ අවධානය යොමුව ඇති අතර ”මේ වගේ හොඳ දුවක් හදලා මට ලබාදුන් අම්මාට බොහොම ස්තුතියි” යනුවෙන් හැඟීම්බර අදහස් එහි අන්තර්ගත බව සඳහන්ය.
එමෙන්ම ඇයට යවන ලද එම අදහස් සහිත කෙටි පණිවුඩයක් සම්බන්ධයෙන්ද විමර්ශකයන්ගේ අවධානය යොමු වී ඇතැයි වාර්තා වේ.
උසස් පොලිස් නිලධාරියෙක් සඳහන් කළේ, දිනේෂ් ෂාෆ්ටර් මහතා ගමන්ගත් මෝටර් රථයේ කිසිවෙකු ගමන් නොකළ බවට CCTV දර්ශනවල පැහැදිලි සාක්ෂි ඇතත් එහි තිබූ කිසියම් දෙයක් සම්බන්ධයෙන් දීර්ඝ විමර්ශනයක් සිදුකරන බවය.
එමෙන්ම ෂාෆ්ටර් මහතා පසුගිය 15 වැනිදා බොරැල්ල කනත්තට ගොස් ඇත්තේ, බිරිඳ සමග එංගලන්තය බලා යාමට හෝරා කිහිපයක් තිබියදීය.
ඊට අමතරව ඔහුගේ මෝටර් රථය ස්ථානගත කර තිබූ ස්ථානය පිළිබඳවද විමර්ශකයන්ගේ අවධානය දැඩිව යොමුවී ඇති අතර සුසාන භූමියේ ”අනාථ පැත්ත” ලෙස හඳුන්වන එම ප්‍රදේශය පැති තුනකින් ආවරණය වන ස්ථානයක් බවට හඳුනාගෙන තිබේ.
සමාගම් කිහිපයක හිමිකරුවකු වන දිනේෂ් ෂාෆ්ටර් මහතා සිදුකරන ලද ව්‍යාපාර කටයුතුවලට රුපියල් කෝටි ගණනක් මුදල් ආයෝජනය කළද එම මුදල් බලාපොරොත්තු වූ පරිදි නැවත ලබාගැනීමට නොහැකි වීමෙන් ඔවුගේ ව්‍යාපාර දිනෙන් දින පාඩු ලබා ඇතැයි මේ වන විට අනාවරණ වී තිබේ.
පවුලේ සමීපතමයින්ගේ ප්‍රකාශවලින් හෙළිවී ඇත්තේ, නුවරඑළිය ප්‍රදේශයෙන් මිලදීගත් රුපියල් කෝටි 300ක් පමණ වටිනා ඉඩමක් පළාත්බද මාර්ග සංවර්ධන අධිකාරියට පවරා ගෙන තිබීමත්, යාපනය ප්‍රදේශයේ මන්ත්‍රීවරයෙකු සම්බන්ධ වී සිදුකළ ව්‍යාපාරයකට ආයෝජන කළ කෝටි 85ක මුදලක් නැවත ඔහු වෙත නොලැබීමත්, ක්‍රිකට් විස්තර විචාරක බ්‍රයන් තෝමස් මහතා වෙත ලබා දුන් රුපියල් කෝටි 160ක මුදල සම්බන්ධයෙන් පවතින ගැටලුකාරී තත්ත්වය සහ තවත් කෝටි ගණනාවක ව්‍යාපාරික ගනුදෙනුවලින් රුපියල් කෝටි 2,000 ක් පමණ ඔහුට පාඩු සිදුවී ඇති බවය.
එසේම ඔහු පදිංචිව සිටි කුරුඳුවත්ත මල් පාරේ නිවස විකිණීම සඳහා පුවත්පතක දැන්වීම් පළකර තිබූ බවත් පවුලේ සමීපතමයන්ගේ ප්‍රකාශවලින් අනාවරණ වී තිබේ.
ෂාෆ්ටර් මහතාගේ මරණය සම්බන්ධයෙන් මේ වන විට ප්‍රකාශ ලබාගෙන ඇති පුද්ගලයින් සංඛ්‍යාව 70කි.