නැවතත් මුව ආවරණ පළඳින්න යැයි සෞඛ්‍ය අංශවලින් උපදෙස්

චක්‍රලේඛයක් මඟින් නියම කර නොමැති වුවද මුව ආවරණ පළඳින ලෙස කායික රෝග පිළිබඳ විශේෂඥ වෛද්‍ය ආනන්ද විජේවික‍්‍රම මහතා ජනතාවගෙන් ඉල්ලා සිටිනවා. 

ඒ මේ දිනවල ව්‍යාප්ත වන වෛරස් රෝගී තත්ත්වවලින් ආරක්ෂාවීම සඳහායි. 

ඒ අනුව මුව ආවරණ පැළඳීම තුළින් වෛරස් රෝග ආසාදනය වීම වළක්වාගත හැකි බවයි ඔහු සඳහන් කළේ. 

විශේෂයෙන්ම වෛරස් රෝගී ලක්ෂණ ඇති පිරිස් කිවිසුම් යවන විට සහ කසින විට මුව නිසි පරිදි ආවරණය කරන ලෙසත් අනෙකුත් පිරිස්ද හැකි සෑම අවස්ථාවකම මෙය අනුගමනය කරන ලෙසයි ඔහු ඉල්ලා සිටියේ. 

මේ අතර මේ දිනවල ස්වසන රෝග සහ වෛරස් රෝග වල යම් ඉහළ යාමක් පෙන්නුම් කරන බව සහ කොවිඩ් රෝගයත් සමඟ ජනතාව පුරුදු වී සිටි සෞඛ්‍ය ආරක්ෂිත ක්‍රමයන් ජනතාවට අමතක වී තිබෙන බව රජයේ වෛද්‍ය නිලධාරීන්ගේ සංගමයේ මාධ්‍ය ප්‍රකාශක වෛද්‍ය චමිල් විජේසිංහ මහතා පවසනවා. 

ඒ හේතුවෙන් බෝ නොවන රෝගීන් සහ කුඩා දරුවන් රෝගී තත්ත්වලට ගොදුරුවීමෙන් වැඩි සංකූලතා ඇතිවිය හැකි බවයි ඔහු වැඩිදුරටත් සඳහන් කළේ.