කතරගම දේවාලයේ පඩුරුවලට කරන දේ ගැන බස්නායක නිළමේ සහ කපුමහත්වරු අතර මත ගැටුම් !

රුහුණු කතරගම දේවාලයට පූජා කරන පඬුරු සහ පූජා භාණ්ඩ පිළිබඳ මේවන විට දැඩි කතාබහක් මතුව තිබෙනවා.

ඒ බැතිමතුන් පූජා කරන පඬුරුවලින් රුපියලක් හෝ දේවාලයේ සංවර්ධන කටයුතු වෙනුවෙන් නොලැබෙන බවට රුහුණු කතරගම මහා දේවාලයේ බස්නායක නිළමේ ඩිෂාන් ගුණසේකර මහතා සිදුකළ අනාවරණයත් සමඟයි.

රුහුණු මහා කතරගම දේවාලයේ ඉල් මහා පෙරහැර ලබන දෙසැම්බර් මස 07වැනිදා පැවැත්වීමට නියමිතව ඇති අතර ඊට අදාළ සාකච්ඡාවක් පසුගියදා රුහුණු මහා කතරගම දේවාලයේ රැස්වීම් ශාලාවේදී පැවැත්වුණා.

එහිදි අදහස් දක්වමින් බස්නායක නිළමේවරයා චෝදනා කළේ, එම පඬුරු සියල්ල කපුමහතුන්ගේ පෞද්ගලික පරිහරණය සඳහා යොදා ගන්නා බවයි.

“ඉල් මහා පෙරහැර මංගල්‍ය දෙසැම්බර් 07 වෙනිදාට යෙදිලා තබෙනවා. මෙවර විශේෂත්වයක් තිබෙනවා ඇසල පෙරහැර මංගල්‍යය අවස්ථාවේදී කපු මහත්වරු විසින් බස්නායක නිලමේවරයා මාස බෙදලා කපු මහත්තවරුන්ට භාරදීපු ඒ ක්‍රමවේදයට පටහැනිව කපුමහත්වරු විසින් දේවාලයේ යතුර ඔවුන් භාරයේ තබාගෙන තිබෙනවා. ඒ නිසා මේ වනවිට දේවාලයට බැතිමතුන්‌ගෙන් ලැබෙන පූජා වට්ටියේ තිබෙන පඬුරු මුදල් සියල්ල කපු මත්තවරු ඔවුන්ගේ පුද්ගලික පරිහරණය සඳහා යොදවනවා. දේවාලයට ලබාදෙන රත්‍රං ඇතුළු පූජා භාණ්ඩත් දේවාලයේ ප්‍රධාන කර්යාලයෙන් රිසිට් පතක් කැඩුවේ නැත්නම් එකත කපුමහත්වරු ගෙදර ගෙනියනවා. මේ වනවිට වැඩි මාස දෙකේ සල්ලිවත්, අනෙක් මාසවල සල්ලිවත් සියල්ල ලැබෙන්නේ නැහැ. පූජා වට්ටියේ තිබෙන බැතිමතුන් තිබෙන සියලුම මුදල් ඒ කපු මහත්තවරුගේ ගෙවල්වලට ගෙනියනවා. ඒ කපු මහත්වරුගේ පුද්ගලික ප්‍රයෝජනය සඳහා. ඒ වගේම දේවාලයට ලැබෙන රත්‍රං ඇතුළු පූජා භාණ්ඩ දේවලෙයෙන් රිසිට්පතක් කැඩුවේ නැත්නම් ඒ කපුමහත්වරු ගෙදර ගෙනියනවා. හැබැයි විහාර දේවාලගම් පනත අනුව මේ මුදල් පරිහරණය වියයුත්තේ මේ ක්‍රමයට නෙමෙයි. හාර දේවාලගම් පන‌තේ බොහොම පැහැදිලිව තියෙනවා බැතිමතුන්ගෙන් ලැබෙන පුද පඬුරු කොහොමද පරිහරණය කරන් ඕනේ කියලා.” යැයි නිලමේවරයා එහිදී අනාවරණය කළා.

නිලමේවරයාගේ එම චෝදනාවට කපුමහත්වරුන්ද පිළිතුරු ලබාදීමට කටයුතු කර තිබුණා.

ඒ අනුව ඊට ප්‍රතිචාර දක්වමින් කපුමහත්වරු සඳහන් කළේ, මාස්පතා දේවාලයේ වැඩිදියුණුව සඳහා මුදල් ලබාදෙන බවයි.

එහිදී අදහස් දැක්වූ රුහුණු මහා කතරගම දේවාලයේ ප්‍රධාන කපුදූර සොමිපාල ටී. රත්නායක මහතා, “පූජා වට්ටියක් බැතිමතෙක් දෙනකොට බැතිමතා දෙනවා තුටු පඬුරක්. ඒ පඬුර අයිති අපට. අනිත් ගේන එකක්වත් අපිට ලැබෙන්නේ නෑ. අපි මේ වංචාකර මුදල් ගන්නා මිනිස්සු නෙමෙයි. තුටු පඬුරක් බැතිමතෙක් දෙන එකක් විතරයි අපි ගන්නේ.”

මේ සම්බන්ධයෙන් අදහස් දැක්වූ රුහුණු මහා කතරගම දේවාලයේ ආනන්ද ටී රත්නායක කපුමහතා පැවසුවේ, පසුගිය මාසයේද රුපියල් ලක්ෂ 20ක මුදලක් ලබා දුන් බවයි.

“කපු මහත්වරු මාස් පතා දෙනවා ලක්ෂ 20 බැගින් ප්‍රධාන කපු මහත්තයා ලක්ෂ 35ක් දෙනවා. ඒ අරන් ගිහින් මොනවා කරනවාද කියන්න අපි දන්නේ නෑ. සැප්තැම්බර් මාසේ ලක්ෂ 20ක් ගෙව්වා.” යැයි ඔහු කියා සිටියා.

“අපිට හම්බවෙනවා තුටු පඩුරක්. ඒවා අපි ඉල්ලන්නේ නෑ. බැතිමතෙක් දෙන හැටියට අපි ඒවා සන්තෝෂයෙන් අර ගන්නවා. ඒ තුටු පඩුරු ඉල්ලන්නේ නෑ. බැතිමතුන් කැමැත්තෙන් දෙන්නේ. ඉතින් අපි ඒක පරිහරණය කර ගන්නවා. කන්න බොන්න අපි ජීවත් වෙනවා ඒකෙන්. එතුමන්ටලත් පිං සිද්ධ වෙන්න ඕන කතරගම දෙවි හාමුදුරුවන්ගේ පිහිටෙන්.” යැයි කතරගම දේවාලයේ තවත් කපුමහතෙක් ප්‍රකාශ කළා.

ඒ සමඟම එම කපුමහත්වරු ඊට අදාල රිසිට් පත්ද මාධ්‍ය වෙත නිකුත් කරනු ලැබුවා.

“කපුමහත්වරුන්ට ලැබෙන තුඩු පඩුරු ගෙදර ගෙනියන්නේ නැතිව අර වලව්වට ගිහින් තියලා යන්නෑ. ඒවා ගෙදර අරන් යනවා. ඒවා අපේ වැඩ කටයුතු කරනවා. පිංකම් කරනවා.” යැයි සොමිපාල ටී. රත්නායක කපු මහතා පැවසුවා.

කෙසේ වෙතත් බැතිමතුන් සිය භක්තියෙන් පූජා කරන සියලු දේ කාගේ හෝ පුද්ගලික පරිහරණයට ලබා ගැනීමට අයිතියක් තිබේද යන්න ගැටලුවක්.

විහාර දේවාලගම් පනත අනුව දේවාලයට පූජා කරන සියලු දේ දේවාලයේ භාරකාරත්වය දරන බස්නායක නිලමේවරයාගේ මූලිකත්වයෙන් නිසායාකාරව එය ගිණුම් තැබිය යුතුයි.