බස් දෙකක් ගැටෙයි – පාසල් ළමුන් ඇතුළු 10ක් රෝහල්ගත කෙරේ !

අධික වේගයෙන් ධාවනය වු පෞද්ගලික බස් රථ දෙකක් මුහුණට මුහුණ ගැටීමෙන් සිදු වු අනතුරකින් පාසල් ළමුන් ඇතුළු 10දෙනෙක් තුවාල ලබා තිබේ.

අප වාර්තාකරු පැවසුවේ එලෙස තුවාල ලැබූ පිරිස නාවලපිටිය දිස්ත්‍රික් මහ රෝහලට ඇතුළත් කළ බවය.

අද (02) උදැසන 7.30ට පමණ එම අනතුර සිදු වී ඇත්තේ හැටන් මහනුවර ප්‍රධාන මාර්ගයේ නාවලපිටිය මීපිටිය ප්‍රදේශයේදීය.

හැටන් සිට මහනුවර දක්වා ධාවනය වු පෞද්ගලික බස් රථයක් සහ මහනුවර සිට හැටන් දක්වා ධාවනය වු පෞද්ගලික බස් රථයක් මෙසේ මුහුණට මුහුණ ගැටී අනතුර සිදුව ඇත.

තුවාල ලැබුවන් අතර පෞද්ගලික බස් රථයක රියදුරා සිටින බවත්, එම මාර්ගයේ අනතුරු බහුල වශයෙන් සිදුවන වංගුවක් අසල එම අනතුර සිදුවී ඇති බවත්, බස් රථ දෙකම අධික වේගයෙන් ධාවනය කර ඇති බවත් අනතුර පිළිබඳ ව පරීක්ෂණ පවත්වන නාවලපිටිය පොලීසිය කියා සිටියේය.

එම බස් රථ දෙකේම රාජ්‍ය සහ පෞද්ගලික ආයතනවල සේවය කරන සේවක සේවිකාවන් පිරිසක්ද සිට ඇති බව නාවලපිටිය පොලීසිය කියා සිටියේය.