තරගකාරී අධ්‍යාපන රටාව මෙරට දරුවන්ගේ මානසිකත්වය මෙන්ම චිත්ත ධෛර්යද ඇතැම් අවස්ථාවල දුර්වල කරන බව රහසක් නොවේ.
ගමේ පාසලෙන් ඒ සාමාර්ථ 9 ක් ලබා කුරුණෑගල ප්‍රසිද්ධ පිරිමි විද්‍යාලයකට පැමිණෙන උසස් පෙළ සිසුවෙකු ජීවිතයෙන් සමුගන්නේ ද තමන් වෙත පැමිණි ගැටළුවලට ස්ථිර විසඳුමක් නොලැබීම හේතුවෙන්.
දඹදෙණිය සිරිගල ප්‍රදේශයේ පදිංචි මෙම සිසුවා පසුගිය වසරේදී සාමාන්‍ය පෙළ විභාගයට පෙනී සිටිමින් ඒ සාමාර්ථ නවයක් ලබාගෙන කුරුණෑගල ප්‍රසිද්ධ විද්‍යාලයට ඇතුළත් වනවා.
ඒ ගණිත අංශයෙන් උසස් පෙළ හැදෑරීමටයි.
ගමේ පාසලේ සහෝදරයන්ගෙන් ලැබුණු ශක්තිය ඔහුට නගරයේ පාසලේ පන්ති කාමරයෙන් නොලැබෙන අතර, එම විදුහලටම ඇතුළත් වන තම හොඳම මිතුරාත් එකතුවන්නේ වෙනත් පන්තියකටයි.
උසස් පෙළ පළමු වාර පරීක්ෂණයේදී 08 වන ස්ථානයට පත්වන මෙම සිසුවා පවතින තත්වය සම්බන්ධයෙන් කළකිරී දෙමාපියන් දැනුවත් කර වෛද්‍ය උපදෙස් වෙත යොමුවන අතර, දරුවාට රෝගයක් නොමැති බවට එහිදී තක්සේරු කෙරෙනවා.
කෙසේ වෙතත් ඊයේ (18) නිවසේ කිසිවෙකුත් නොමැති අවස්ථාවක ඔහු ගෙළ වැළලාගෙන සියදිවි නසාගෙන තිබුණා.