රජයේ කාර්යාල කිහිපයකට සයිබර් ප්‍රහාරයක් එල්ල වී තිබෙනවා.
මෙලෙස එල්ල වූ සයිබර් ප්‍රහාරය හේතුවෙන් මේ වනවිට අදාළ රාජ්‍ය ආයතන රැසක අත්‍යවශ්‍ය දත්ත අස්ථානගත වී ඇති බවයි වාර්තා වන්නේ.
gov.lk රාජ්‍ය ආයතනවල විද්‍යුත් ලිපිනයන් ඉලක්ක කරගෙන මෙම සයිබර් ප්‍රහාරය එල්ල වී තිබෙනවා.
ශ්‍රී ලංකා තොරතුරු හා සන්නිවේදන තාක්ෂණ නියෝජිත ආයතනය සඳහන් කළේ, මෙම වසරේ මැයි මස 17 වැනි දින සිට අගෝස්තු මස 26 වැනි දින දක්වා වූ කාලය තුළ මෙම සයිබර් ප්‍රහාරයන් එල්ල වී ඇති බවයි.
එහි ප්‍රධාන විධායක නිලධාරී මහේෂ් පෙරේරා මහතා පැවසුවේ, කැබිනට් කාර්යාලය ඇතුළු රජයේ කාර්යාල 300ක විද්‍යුත් ලිපිනයන් 5,000ක පමණ තොරතුරු අස්ථාන ගත වී ඇති බවටත් හෙළිව තිබෙන බවයි.
මෙවැනි තත්ත්වයන් යළිත් ඇති නොවීම සඳහා අවශ්‍ය යාවත්කාලීන කිරීම් සිදු කිරීමට තොරතුරු තාක්ෂණ ආයතනය කටයුතු කරමින් සිටින බවයි වැඩිදුරටත් වාර්තා වන්නේ.