සධීර සමරවික්‍රමගේ විශිෂ්ඨ ඉනිම හා දසුන් ශානකගේ අනර්ග පන්දු යැවීම හමුවේ බංග්ලාදේශයට එරෙහිව ලකුණු 21 ක ජයක් වාර්තා කරමින් මෙවර ආසියානු කුසලාන එක්දින ක්‍රිකට් තරගාවලියේ (Asia Cup 2023) සුපිරි 4 වටයට ජයග්‍රාහී ආරම්භයක් ලබා ගැනීමට ශ්‍රී ලංකා කණ්ඩායම අද (9) සමත් වුණා.
කොළඹ ආර්. ප්‍රේමදාස ක්‍රීඩාංගනයේ පැවැති තරගයේ කාසියේ වාසිය දිනූ බංගලාදේශය පළමුව පන්දුවට පහර දීමේ අවස්ථාව ශ්‍රී ලංකාවට ලබා දුන් අතර, ඒ අනුව ශ්‍රී ලංකාව නියමිත පන්දුවාර 50 නිමා කළේ කඩුලු 9 ක් දැවී ලකුණු 257 ක් ලබා ගනිමින්.
පිළිතුරු ඉනිම ක්‍රීඩා කළ බංග්ලාදේශයට පන්දුවාර 48 එක් පන්දුවක් අවසානයේ සියලු දෙනා දැවී ලබා ගත හැකි වූයේ ලකුණු 236 ක් පමණයි.
සටන්කාමී ඉනිමක් දියත් කළ තවුහිද් හ්රිදෝයි ලකුණු 82 ක් රැස් කළේ පන්දු 97 කින්. ඒ, හයේ පහරක් හා හතරේ පහර 7 ක් ද සමගින්. මුෂ්ෆිකර් රහීම් ලකුණු 29 ක්, මෙහෙදි හසාන් මිරාස් ලකුණු 28 ක් හා මොහමඩ් නයීම් ලකුණු 21 ක් රැස් කළා.
පන්දු යැවීමේ දී දසුන් ශානක ලකුණු 28 කට කඩුලු 3 ක් දවා ගත් අතර, මහීෂ් තීක්ෂණ ලකුණු 69 කට කඩුලු 3 ක් ද, මතීෂ පතිරණ ලකුණු 58 කට කඩුලු 3 ක් ද බිද හෙලුවා.
පළමුව පන්දුවට පහරදුන් ශ්‍රී ලංකා ඉනිමේ වැඩිම ලකුණුලාභියා වූ සධීර සමරවික්‍රම පන්දු 72 කින් ලකුණු 93 ක් රැස් කළා. හයේ පහර 2ක් හා හතරේ පහර 8 ක් ඔහුගේ ඉනිමට ඇතුළත්. කුසල් මෙන්ඩිස් ලකුණු 50 ක් ද, පැතුම් නිස්සංක ලකුණු 40 ක් ද රැස් කරමින් ශ්‍රී ලංකා ඉනිම ශක්තිමත් කළා.
පන්දු යැවීමේ දී හසන් මහ්මුද් හා ටස්කින් අහ්මඩ් කඩුලු 3 බැගින් බිද හෙලුවා. ශොරිෆුල් ඉස්ලාම් කඩුලු 2 ක් ද දවා ගත්තා.
මෙම ජයත් සමඟ එක්දින ක්‍රිකට් ඉතිහාසයේ දී වැඩිම තරග ප්‍රමාණයක් අඛණ්ඩව ජයගත් කණ්ඩායම් ලැයිස්තුවේ දෙවැනි ස්ථානය හිමි කර ගැනීමට ශ්‍රී ලංකා කණ්ඩායම සමත් වුණා.
මේ වන විට ශ්‍රී ලංකාව අඛණ්ඩව ජය ගෙන ඇති එක්දින තරග සංඛ්‍යාව 13 ක්. එම තරග 13 තුළ දී ම ශ්‍රී ලංකා කණ්ඩායම ප්‍රතිවාදී කණ්ඩායමේ සියලු පිතිකරුවන් දවා ගැනීමට ද සමත්ව තිබීම විශේෂත්වයක්. ප්‍රතිවාදී කණ්ඩායමේ සියලු පිතිකරුවන් අඛණ්ඩව වැඩිම වාර ගණනක් දවාගත් කණ්ඩායම ලෙස ද ශ්‍රී ලංකා කණ්ඩායම වාර්තාව උසුලනවා.
වැඩිම තරග ප්‍රමාණයක් අඛණ්ඩව ජයගත් කණ්ඩායම් ලැයිස්තුවේ පළමු ස්ථානය ඔස්ට්‍රේලියාවට හිමිව තිබෙනවා.
2003 වසරේ දී ඔවුන් අඛණ්ඩව තරග 21 ක් ජය ගනිමිනුයි එම වාර්තාව පිහිටුවා ඇත්තේ.
පිතිකරුවන්ට අපහසු ක්‍රීඩා පිටියක වේගවත් ලකුණු 93ක් රැස් කරමින් ශ්‍රී ලංකාව සටන්කාමි ලකුණු සංඛ්‍යාවක් දක්වා රැගෙන ගිය සධිර සමරවික්‍රම තරඟයේ වීරයා සම්මානය හිමි කරගනු ලැබුවා.
